काठमाडाैं, भाद्र ३० ।
एशिया कपको सुपर ४ को अन्तिम खेलमा बंगलादेशले भारतलाई ६ रनले पराजित गरेकाे छ ।

बंगलादेशले दिएको २६६ रनको लक्ष्य पन्छाएको भारत ४९ दशमलव ५ ओभरमा २५९ रनमा अलआउट भयो । जसमा शुभमन गिलले १२१ रनको पारी खेले पनि टोलीलाई जिताउन सकेनन् ।
बंगलादेशका मुस्ताफिजुर रहमानले ३ विकेट लिए ।

त्यसअघि कोलोम्बोमा जारी खेलमा टस हारेर पहिला ब्याटिङको निम्तो पाएको बंगलादेशले निर्धारित ५० ओभरमा ८ विकेट गुमाउँदै २६५ रन बनाएको थियो ।

सकिब अल हसनको कप्तानी पारीको मद्दतले बंगलादेशले भारतसामु मध्यम लक्ष्य प्रस्तुत गरेको थियो । सकिबले ८५ बलमा ६ चौका र तीन छक्का प्रहार गर्दै ८० रनको कप्तानी पारी खेलेका हुन् ।

बंगलादेशले पहिलो ६ ओभरमा २८ रन जोड्दा तीन विकेट गुमाएको थियो । बंगलादेशले ओपनर लिट्टोन दासलाई खाता खेल्न नपाई पहिलो विकेट गुमाएको थियो । त्यस्तै अर्का ओपनर तान्जिद हसनलाई व्यक्तिगत १३ रनमा गुमाएको बंगलादेशले तेश्राे विकेटको रूपमा चार रन बनाएका अनामुल हकलाई गुमाएको थियो । सुरुवाती तीन विकेट सस्तैमा गुमाएको बंगलादेशको पारी कप्तान सकिब हल हसन समाहाले ।

सकिबसँग ३० रनको साझेदारी गरेका मेहिदी हसन मिराज १३ रनमा पेभिलियन फर्किए । त्यसपछि सकिब अल हसन टाउहिड ऋदोयसँग १०१ रनको साझेदारी गर्दै आउट भए । बंगलादेशका लागि नासुम अहमदले ४४ रनको योगदान गर्दा मेहन्दी हसन २९ र तान्जिम हसन सकिव १४ रनमा अविजित रहे ।

भारतका लागि सार्दुल ठाकुरले सर्वाधिक तीन विकेट लिए । उनले १० ओभर बलिङ गर्दा ६५ रन खर्चेर तीन विकेट लिए । त्यस्तै ८ ओभर बलिङ गर्दै ३२ रन खर्चेर मोहम्मद सामीले दुई विकेट लिए । भारतका लागि अक्षर पटेल, प्रशिद कृष्णा र रविन्द्र जडेजाले एक-एक विकेट लिए ।

बिहीबारको खेल हारे पनि भारत यसअघि नै फाइनलमा पुगिसकेको छ । बंगलादेश भने बाहिरीसकेको छ ।

एशिया कपको उपाधिका लागि भारत र श्रीलंका भिड्ने छन् ।

फाइनल खेल आइतबार हुने भएकाे छ ।