पाठेघरकाे मुखकाे क्यान्सरविरुद्ध खाेप लगाउने अवधि १० गतेसम्म थप
काठमाडाैं, असाेज ६ ।
पाठेघरको मुखको क्यान्सरविरुद्धकाे खोप ‘एचपीभी’ लगाउने समयावधि आउँदो १० गतेसम्म थप गरिएको छ ।
खोप अभियानमा लक्षित किशोरीमध्ये अझै आधाले खोप लगाउन बाँकी रहेकाले पाँच दिन समय थपिएको स्वास्थ्य सेवा विभाग परिवार कल्याण महाशाखाअन्तर्गतको खोप शाखाले जनाएको छ । यसअघि हिजो शुक्रबारसम्म समय थप गरिए तापनि यस अवधिमा शनिबार, शोक बिदा, तीज, शिक्षक आन्दोलनलगायतका कारण खोप अभियान प्रभावकारी हुन सकेको छैन ।
पहिलो चरणमा १४ वर्ष नाघेका र १५ वर्ष नपुगेका किशोरीहरूलाई खोप दिन थालिएको हो । यो उमेर समूहका किशोरीको सङ्ख्या साढे तीन लाख रहेको छ । सरकारले गएको भाद्र २७ गतेदेखि थापाथलीमा रहेको परोपकार प्रसूति तथा स्त्री रोग अस्पतालबाट एचपीभी खोप अभियान सुरु गरेको हो ।
कोशी प्रदेशको कोशी अस्पताल, मधेश प्रदेशको नारायणी अस्पताल वीरगञ्ज, वागमती प्रदेशको परोपकार प्रसूति तथा स्त्री रोग अस्पताल थापाथली, गण्डकी प्रदेशको गण्डकी स्वास्थ्य विज्ञान प्रतिष्ठान पोखरा, लुम्बिनी प्रदेशको भेरी अस्पताल बाँके, कर्णाली प्रदेशको प्रादेशिक अस्पताल सुर्खेत र सुदूरपश्चिम प्रदेशको डडेल्धुरा अस्पतालमा एचपीभी खोप उपलब्ध रहेको छ ।
खोप पहिलो मात्रा दिएको ६ महिनापछि दोश्राे मात्रा दिइनेछ । एचपीभी खोप दुई मात्रा लगाएपछि पाठेघरको मुखमा हुने क्यान्सरको सङ्क्रमण ९५ प्रतिशत सुरक्षा प्रदान गर्ने स्वास्थ्य मन्त्रालयले जनाएको छ ।
प्रतिक्रिया