काठमाडौं, असोज ६ ।
नेपाल क्रिकेट संघ (क्यान) को चुनावले नयाँ नेतृत्वको चयन गरेको छ ।

नेपाल क्रिकेट सङ्घको केन्द्रीय सचिवमा पारस खड्का विजयी भएको छ ।

अध्यक्षमा चतुरबहादुर चन्दसहित तीन पदाधिकारी र तीन केन्द्रीय सदस्य निर्विरोध भएका थिए भने एक सचिव र १० केन्द्रीय सदस्य चुनावबाट निर्वाचित भएका हुन् ।

क्यानको आज शनिबार भएको केन्द्रीय निर्वाचनमा पूर्वकप्तान खड्का कार्यवाहक सचिव प्रशान्तविक्रम मल्ललाई पछि पार्दै निर्वाचित भएका हुन् । उनी क्यानको वागमती प्रदेशका अध्यक्षसमेत हुन् । कूल ८५ मतदाता रहेकामा खड्काले ४८ मत प्राप्त गरे भने उनको प्रतिद्वन्द्वीले ३७ मत प्राप्त गरेका छन् ।

निर्वाचित सचिव पारसले क्रिकेट खेलका लागि जिल्ला र प्रदेशलाई बलियो बनाउँदै अगाडि बढाउने विचार व्यक्त गरे । क्रिकेट खेलमा लागेर बाँच्न सकिने वातावरणको सिर्जना गर्न आफू प्रयासरत रहनेसमेत उनको भनाई रहेको छ ।

त्यस्तै, क्यानको अध्यक्षमा चन्द पुनः अध्यक्ष पदमा निर्विरोध निर्वाचित भएका छन् । उपाध्यक्षमा रोशन सिंह र कोषाध्यक्षमा कर्णाली प्रदेश क्रिकेट सङ्घका अध्यक्ष खड्का निर्विरोध निर्वाचित भएका छन् ।

महिला सदस्यमा जयन्ती भट्ट निर्विरोध निर्वाचित भएकी छन् । सदस्यमा लुम्बिनी प्रदेशबाट प्रदीप मजगैँया र कर्णालीबाट श्रीधर केसी पनि सर्वसम्मत चयन भएका छन् ।

अरू पाँच प्रदेशबाट प्रतिनिधित्व गर्ने एक–एक जना सदस्य र खुला पाँच सदस्यका लागि पनि चुनाव भएको थियो । त्यसमा कोशीबाट अर्जुन पौडेल ४७ मत प्राप्त गर्दै विजयी भएका छन् भने मधेश प्रदेशबाट माधवकुमार कर्माचार्य र मोहम्मद दाउद अन्सारीको भोट ४२ बराबर हुँदा गोलाप्रथाबाट माधवकुमार कर्माचार्य विजयी भएका हुन् ।

त्यस्तै, गण्डकीबाट सुदीप शर्मा ५२ मतसहित विजयी भए भने वागमतीमा दिवाकर घले ४६ मत ल्याएर विजयी भए । सुदूरपश्चिमबाट विक्रम बिष्ट ४९ भोट प्राप्त गर्दै विजयी भए । खुला सदस्यमा धीरेन्द्र साउद ५९ र दुर्गाराज पाठक ५४ ल्याएर निर्वाचित भएका थिए ।

त्यस्तै, आयुष श्रेष्ठले ५१ मत प्राप्त गरे भने वीरेन्द्र चन्द ३४ मत ल्याएर विजयी भए । करण महतरा क्षेत्री र ऋषिराम गौतमले बराबर २६ मत प्राप्त गरे भने र गोलाप्रथा गर्दा महतरा विजयी भए ।

पाँच प्रदेशबाट चयन हुने एक–एक सदस्यका लागि कूल १० जनाको उम्मेदवारी परेको थियो । खुलातर्फका पाँच जनाका लागि १३ को उम्मेदवारी परेको थियो । क्यानको निर्वाचनमा कूल ८५ जनाले मतदान गरेका थिए ।