काठमाडाैं, असाेज ८ ।
यू–१९ साफ च्याम्पियनशीपअन्तर्गत घरेलु मैदानमा भएको खेलमा नेपालले माल्दिभ्सलाई पराजित गरेको छ । आज सोमबार काठमाडौंको दशरथ रंगशालामा माल्दिभ्सलाई ४–१ गोल अन्तरले हराउँदै नेपाल सेमिफाइनलमा प्रवेश गरेको हो ।

खेलको १७ औँ मिनेटमा प्रशान्त लक्षमले गोल गर्दै नेपाललाई सुरुआती अग्रता दिलाएका थिए । डिबक्सभन्दा निकै टाढाबाट प्रशान्तले प्रहार गरेको बल गोलमा परिणत भएको थियो । समिर तामाङले ३० औँ मिनेटमा नेपालको अग्रतालाई दोब्बर बनाएका थिए ।

दोस्रो हाफमा ५८ औँ मिनेटमा लायन रसिदले गोल गर्दै माल्दिभ्सलाई खेलमा फर्काउने कोशिश गरेका थिए । तर खेल सकिन दुई मिनेट बाँकी छँदा निराजन धामीले गोल गर्दै नेपाललाई जितको नजिक पुर्‍याएका थिए ।

दोस्रो हाफको इञ्जुरी समयमा निराजन धामीले ब्यक्तिगत दोस्रो गोल गर्दै नेपाललाई फराकिलो जित दिलाए ।

पहिलो खेलमा पाकिस्तानसँग पराजित बनेको नेपाललाई सेमिफाइनलमा स्थान बनाउन माल्दिभ्सलाई हराउनै पर्ने दबाब थियो । बराबरीको नतिजाले मात्र माल्दिभ्स अन्तिम चारमा पुग्न सक्थ्यो ।

तर नेपालले आफू अनुकूलको जितसहित समूह उपविजेताको रूपमा अन्तिम चारमा स्थान पक्का गरेको छ । माल्दिभ्स भने प्रतियोगिताबाट बाहिरिएको छ ।