काठमाडाैं, असाेज ९ ।
पोखराको मणिपाल अस्पतालमा बिरामीको मृत्यु भएपछि आफन्तले सुरु गरेको नाराबाजी र तोडफोडलाई नियन्त्रणमा लिने क्रममा चार जना प्रहरी घाइते भएका छन् ।

लमजुङको सुन्दरबजार नगरपालिका-६ की ५७ वर्षीया सुकमाया दुराको उपचारका क्रममा मणिपाल शिक्षण अस्पतालमा सोमबार मृत्यु भएको थियो । मृत्युपछि आफन्तले चिकित्सकमाथि हातपात गर्नुका साथै अस्पतालमा तोडफोडसमेत गरेका थिए ।

प्रदर्शनलाई नियन्त्रणमा लिने क्रममा चार जना प्रहरी घाइते भएको जिल्ला प्रहरी कार्यालय कास्कीले जनाएको छ ।

घाइते हुनेहरूमा वडा प्रहरी कार्यालय बगरका प्रहरी वरिष्ठ हवल्दार काले परियार (निधारमा तीन वटा टाँका), जिल्ला प्रहरी कार्यालय कास्कीमा कार्यरत वरिष्ठ प्रहरी हवल्दार बालकृष्ण रानाभाट, कृष्णबहादुर विक र प्रहरी जवान अनिता राजवंशी रहेका छन् ।