काठमाडाैं, असाेज १६ ।
नेपाल पञ्चाङ्ग निर्णायक समितिले यस वर्षको दशैँका विभिन्न साइतहरू सार्वजनिक गरेको छ । असोज २८ गते आइबार बिहान ११ बजेर २९ मिनेटमा घटस्थापनाको साइत रहेको समितिका कार्यकारी निर्देशक सूर्यप्रसाद ढुङ्गेलले जानकारी दिएका छन् ।

घटस्थापनाका दिन चित्रा नक्षत्र र वैधृति योग परेकाले ११ बजेर २९ मिनेटअघि चित्रा नक्षत्र र वैधृति योगको शान्ति गरेर घटस्थापना गर्नुपर्छ ।

असोज २९ गते सोमबार झण्डा फेर्ने साइत १० बजेर १९ मिनेटमा रहेको छ । पश्चिम फर्केर झण्डा फेर्नुपर्ने उनले जानकारी दिए । कार्तिक २ गते बिहीबार पचली भैरव यात्रा गरिन्छ ।

कार्तिक ४ गते शनिबार फूलपाती परेको छ । फूलपातीकै दिन तुलजा भवानीलाई मूल मन्दिरबाट हनुमानढोकाको मूल चोकमा यात्रा गराइन्छ । मूलचोकमै भवानीलाई साक्षी राखेर महाअष्टमीका दिन राति कालरात्री पूजासहित राज्यकोतर्फबाट बोका र राँगाको बलि दिइन्छ । तुलजा भवानी यात्राको साइत बिहान ८ बजेर २४ मिनेटमा रहेको छ । तुलजा भवानीलाई बिहान ९ बजेर ३५ मिनेटमा स्थिरासन गराइन्छ ।

कार्तिक ५ गते आइतबार महाअष्टमी, त्यसै राति कालरात्रीको पूजा गर्नुपर्ने समितिले जनाएको छ ।

कार्तिक ६ गते सोमबार महानवमी पर्व मनाइन्छ ।

कार्तिक ७ गते मंगलबार विजया दशमी पर्व परेको छ । घटस्थापनाका दिनदेखि पूजा आराधना गरिने देवीलाई बिहान १० बजेर ३७ मिनेटमा बिसर्जन गरिने साइत रहेकाे छ ।

विजया दशमीका दिन साइत खोजेर टीका लगाउनेका लागि बिहान ११ बजेर २ मिनेटको साइत शुभ रहेको छ । टीका लगाउने मानिस पश्चिम मोहडा फर्किनुपर्ने समितिले जनाएको छ । त्यस दिनदेखि कोजाग्रत पूर्णिमासम्म दुर्गा भवानीको प्रसाद लगाउन सकिन्छ ।

विजया दशमीका दिन बिहान ९ बजेर २ मिनेटमा तुलजा भवानीलाई मूल चोकबाट मूल मन्दिरमा फिर्ती यात्रा गराइने साइत परेकाे छ । तुलजा भवानीलाई बिहान १० बजेर ३ मिनेटमा स्थिरासन गराइने साइत पनि समितिले निकालेको छ ।

खड्ग यात्रा पनि यसै दिन गरिने छ ।