काठमाडाैं, असाेज १७ ।
नेपाली साँगितीक आकाशकी प्रसिद्ध तथा वरिष्ठ गायिका दिलमाया खातीको ९१ वर्षकाे उमेरमा निधन भएको छ । उनको दार्जिलिङमा रहेको आफ्नै निवासमा निधन भएको पारिवारिक श्राेतले जनाएको छ ।

केही समयदेखि अस्वस्थ रहेकी खातीको सिलगढीमा उपचार भइरहेकोमा सुधार नभएपछि गएको आइतबार आफ्नै निवासमा ल्याइएको थियो । दार्जिलिङको घुम पहाडमा वि.सं. १९९६ को श्रावण २३ गते माता अतिरूपा खाती र पिता नन्दलाल खातीका तीन सन्तानमध्ये सबैभन्दा कान्छी दिलमाया खातीले पाँच वर्षको उमेरदेखि गाउन सुरु गरेकी हुन् । खातीले दर्जनौँ कालजयी गीतमा स्वर दिएकी छन् ।

हिमालको काखमा छ सानो मेरो गाउँ, बिछोडको पीडा नसकी खप्न दशैँको बेलामा, मनमा तिम्रो प्रित होस्, जिउनु देऊ मलाई एकलै, मायालु हजार हुन्छ, तिम्रो जस्तो मुटु मेरो पनि, तिमी देख्दा रहर होला लागेर आउँछलगायतका दर्जनौँ गीतमा खातीको स्वर रहेको छ ।

दिलमाया खाती पहिलो पटक सन् १९६२ मा काठमाडाैं आएकी थिइन् । काठमाडाैं आएका बेला आफन्तकोमा उनले गाउनु भएको गीत सुनेर संगीतकार शिवशंकर, नातिकाजी श्रेष्ठ र गायिका तारादेवीले नेपाली गीत गाउन आग्रह गरेकी थिइन् । त्यसपछि उनले नेपाली गीत गाउन सुरु गरेकी थिइन् ।

अविवाहित दिलमायाले वरिष्ठ गायक गायिका एवम् संगीतकारसँग काम गरिसकेकी छन् । संगीतकार एवम् गायक गोपाल योञ्जन, कर्म योञ्जन, नारायण गोपाल, तारादेवी, मिरा राणासँग उनले गीत गाएकी छन् ।

यस्तै, युवा पुस्तामा गायक शैलेश सिंहसँग पनि उनले सहकार्य गरेकी छन् । नारायण गोपालसँग दिलमायाको भेट सन् १९७२ तिर दार्जिलिङमै भएको थियो । दिलमाया खातीले कैयौं दिग्गज कलाकारहरूसँग पनि युगल गीत गाएकी छन् ।