काठमाडाैं, असाेज २८ ।
बडा दशैँको पहिलो दिन आज आइतबार घर–घरमा जमरा राखी नवदुर्गा भवानीको स्थापना गरेका छन् । घटस्थापनाको दिन काठमाडौंको हनुमानढोकास्थित दशैँ घरमा पनि विधिवत रूपमा जमरा राखिएको छ ।

बिहान ११ बजेर २९ मिनेटको शुभ साइतमा हनुमानढोका दरबारका पुजारीले जमरा राखेका हुन् । सो क्रममा नेपाली सेनाको ब्याण्ड बाजा टोलीले मंगल धुन बजाएको छ । सँगै बन्दुक पड्काएर बढाइँ गरी दशैँको शुभारम्भ गरेको छ । हनुमानढोकाको दशैँ घरमा नवरात्रभर विधिपूर्वक पूजा आराधना गरिनुका साथै मंगल धुन पनि बजाइन्छ ।

दशैँ घरमा घटस्थापनापछि दैनिक बलि दिई विधिपूर्वक पूजा आराधना गरिन्छ । यस वर्ष पनि महानवमीका दिन हनुमानढोकाको कोतमा ५४ बोका र ५४ राँगासहितको बलि दिइनेछ ।