नेपालीहरूकाे महान् चाड विजया दशमी २०८० तथा दशैँको अवसर पारेर ओएस नेपालको आयोजनामा तथा प्रस्तुतिमा रहेको भजनको गीति एल्बम भक्ति सागर काठमाडाैंमा एक भव्य  समारोहकाबीच सार्वजनिक गरिएको छ । विश्व कृतिमानी वरिष्ठ साहित्यकार सुरेन्द्र महर्जन ‘अमर’ को रचनामा रहेको उनको यो ३३ औँ कृति हो भने यस भक्ति सागर (गीति एल्बम) भजनमा चार वटा भजनहरू जय गणेश, दुर्गे भवानी, हे राम राधे श्याम, हरे राम भजनहरू समावेश रहेका छन् । स्वयम् रचनाकार सुरेन्द्र महर्जनकै स्वर यस गीति एल्बमभित्र रहेको छ । एल्बमभित्र रहेको सम्पूर्ण भजनहरूमा वरिष्ठ संगीतकार राम कार्कीको एकल संगीत र एरेञ्ज रहेको छ ।

एल्बम सार्वजनिक समारोहमा सयौँ जनाको सहभागिता रहेको थियो । ओएस नेपालको तर्फबाट विवेक कार्कीले कार्यक्रमको सभापतित्व ग्रहण गरिएको थियो । उक्त कार्यक्रममा दिनेश डि. सि, चर्चित एवं विश्व कृतिमानी संगीतकार सन्तोष श्रेष्ठ, गायक शिव परियार, गायक रामकृष्ण ढकाल, एच. बि. ताम्राकार, अरुण देव जोशी, बब्लु गुप्ता  नेपाल, राजेन्द्र ताम्राकार, पदम सुनार, हरि ढकाल, प्रभा शर्मालगायत अथितीहरूकाे उपस्थिति रहेकाे थियाे । दशैँको शुभ अवसर पारेर भजन सार्वजनिक गर्न पाउँदा खुसी लागेको ओएस नेपालको तर्फबाट सुमन सापकोटाले  जानकारी दिएका छन् ।
दशैँकाे पूर्वसन्ध्यामा विमाेचित यस एल्बमले सबैकाे मन जित्नेमा गायक तथा रचनाकार अमरकाे धारणा रहेकाे छ ।