काठमाडाैं, कार्तिक २ ।
नेपालीहरूको महान् चाड बडा दशैँको आज बिहीबार पाँचौँ दिन देशभरको मठमन्दिर र शक्तिपीठहरूमा हिन्दू धर्मावलम्बीहरूको ठूलाे घुइँचो लागेको छ । आज शक्ति स्वरूपा भगवती स्कन्दमाताको विशेष पूजा आराधना गरी मनाइँदैछ ।

स्कन्दमाता कमल ओछ्याएर बस्ने भएकाले यी देवीलाई पद्मासना देवी पनि भन्ने गरिन्छ । सूर्यमण्डलकी आधिष्ठात्री देवी भएका कारण स्कन्दमाताको पूजा गर्ने भक्तजन अलौकिक तेज र कान्तिले सु–सम्पन्न हुने धार्मिक विश्वास रही आएकाे छ । आश्विन शुक्ल प्रतिपदादेखि सुरु भएको दशैँ पूर्णिमासम्म दुर्गा भवानीको पूजा गरेर मनाउने चलन छ । काठमाडौं उपत्यकाका शक्तिपीठमा बिहानैबाट भक्तजनको भीड लागेको छ ।

ललितपुरकाे बंगलामुखी, काठमाडाैंकाे गुह्वेश्वरी, दक्षिणकाली, कालिकास्थान, मैतीदेवी, इन्द्रायणी, तलेजु भवानी, विजेश्वरी, शोभा भगवती, नक्साल भगवती र भद्रकाली, पाथीभरा, पलाञ्चाेक भगवती, छिन्नमस्ता, मनकामनालगायतका शक्तिपीठहरूमा भक्तजनको बाक्लो उपस्थिति रहेकाे छ ।