काठमाडौं, कार्तिक ४  ।
हरेक वर्ष दुर्गा पक्षअन्तर्गत आश्विन शुक्ल सप्तमीका दिनमा मनाइने फूलपाती पर्व आज शनिबार घर–घरमा शास्त्रीय विधिअनुसार शुभ साइतको प्रतीक फूलपाती भित्राई मनाइँदैछ ।

घटस्थापनाका दिनदेखि वैदिक विधिपूर्वक दुर्गालाई आह्वान गरी पूजाआजा गरिएको दशैँ घर अथवा पूजा कोठामा शुभ साइतको प्रतीकका रूपमा उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र अन्य नयाँ पालुवासमेत भित्राउने गरिन्छ ।

नवरात्रीकाको नामले समेत चिनिने फूलपाती नौ देवीको प्रतीकका रूपमा भित्र्याई शास्त्रीय विधिअनुसार शक्तिको आराधनाका साथ पूजा गर्ने वैदिक विधि रहेको छ ।

फूलपाती भित्र्याउनका लागि साइतको आवश्यकता पर्दैन । परम्पराअनुसार दुर्गा भवानीको प्रतिमा राखिएको दशैँ घरमा फुलपातीको शुभ साइतको रूपमा उखु, अदुवा, केराको बोट धानको बाला, बेलपत्र दारीम जयन्ती, ओकको फुल तथा नयाँ पालुवासमेत भित्र्याइन्छ ।

फुलपातीको दिन अर्थात नवरात्रीको सातौँ दिन घर–घरमा फुलपाती भित्र्याइदै नवदुर्गा भवानीको स्वरूप मानेर कालरात्री देवीलाई पूजा गरिन्छ । माता कालरात्रीको स्वरूप डरलाग्दो जस्तो देखिन्छ तर, यिनी भक्तलाई शुभ फल दिने जनविश्वास रही आएकाे छ ।

घटस्थापनाकेै दिनदेखि दशैँ सुरु भए तापनि फुलपातीको दिनदेखि विशेष दशैँको चहलपहल सुरु हुने गर्दछ । फुलपातीको दिनदेखि सरकारी कार्यालय पनि बिदा हुने भएकाले परिवारजनबाट टाढा रहेकाहरू विजया दशमीको दिन मान्यजन तथा आफन्तसँग आशिर्वाद लिई टीका थाप्न घरतिर जाने गर्छन् ।