काठमाडौं, कार्तिक २४ ।
यो वर्ष तिहारमा काठमाडौं महानगरपालिकाभित्र राति १ बजेसम्म देउसी भैलो खेल्न पाइने भएको छ । यसअघि प्रत्येक वर्ष सुरक्षाको कारण देखाउँदै ९ बजेसम्म मात्रै खेल्न दिइने देउसी यो वर्ष राति १ बजेसम्म खेल्न दिइने काठमाडौं महानगरपालिकाले जानकारी दिएको छ ।

महानगरपालिकाका मेयर बालेन्द्र शाह (बालेन)ले सामाजिक संजाल फेसबुकमा एक स्ट्याटस लेख्दै यस्तो बताएका हुन् । विगतको वर्षहरूमा कोभिडको कारण तथा सुरक्षाको कारणले गर्दा तिहारमा देउसी भैलो खेल्ने समय काठमाडौ महानगर भित्र राति ९ बजेसम्म मात्र खेल्न अनुमति दिइएको थियो ।

यो वर्ष काठमाडौ महानगर नगर प्रहरीले ‘राति १’ बजेसम्म सुरक्षाको लागि पेट्रोलिङको व्यवस्था मिलाइएको उनले बताएका छन् ।

सोही समयसम्म मर्यादित भएर देउसी भैलो खेल्न उनले आग्रहसमेत गरेका छन् ।

यस्तै, काठमाडौं महानगरपालिकाले नेपाल प्रहरी तथा जिल्ला प्रशासन कार्यालयलाई सुरक्षाको प्रबन्ध पनि सोहीअनुसार मिलाई दिन आग्रह गरेका छन् ।