काठमाडौं, कार्तिक २८ ।
वरिष्ठ बाल साहित्यकार शान्तदास मानन्धरको ९० वर्षको उमेरमा निधन भएको छ । स्थानीय बयोधा अस्पतालमा उपचारका क्रममा आज मंगलबार उनको निधन भएको साहित्यकार प्रा. जगत् उपाध्यायले बताएका छन् ।

स्वर्गीय मानन्धर पहिलो पारिजात बाल साहित्य सम्मान २०७०, जगदम्बा श्री सम्मान २०७५ लगायत धेरै सम्मान तथा पुरस्कारबाट सम्मानित भएका थिए ।

साहित्यकार मानन्धरले ‘बाल कोसेली’, ‘बाल पोष’ र ‘मचा क्यब’ नामका बाल साहित्यिक पत्रिका सम्पादन एवं प्रकाशकन गरेका थिए । छ दशकभन्दा लामो समयदेखि बाल साहित्यमा आफ्नो जीवन समर्पण गरेका उनले राणा शासनदेखि नै बाल खुराक पस्कदै आएका थिए ।

साहित्यकार उपाध्यायकाअनुसार मानन्धरको अन्त्येष्टि भोलि बुधबार गरिने भएको छ ।