एजेन्सी, कार्तिक ३० ।
चीनको साङ्सी प्रान्तमा एक भवनमा भएको आगलागीमा परी कम्तीमा पनि २६ जना मारिएका छन् ।

व्यस्त शहरको व्यावसायिक भवनमा आगलागी हुँदा उक्त हताहती भएको हो । चीनियाँ सरकारी सञ्चार माध्यमहरूकाअनुसार लुलियाङ शहरस्थित चार तले भवनमा आगलागी भएको हो । स्थानीय समयानुसार बिहान ७ बजे आगो लागेको थियो ।

सुरक्षाकर्मीहरूले भवनमा फसेका दर्जनौँ मानिसलाई बाहिर निकालेका छन् । आगलागीमा घाइते ५१ जनालाई स्थानीय अस्पताल लगिएको थियो ।

सरकारी अखबार बेइजिङ युथ डेलीले सामाजिक सञ्जाल विबोमा आगलागीको भिडियो पोष्ट गरेको छ । भवनमा भयंकर आगो लागिरहेको र धुँवा निस्किरहेको भिडियोमा देख्न सकिन्छ ।

साङ्सी चीनको सबैभन्दा ठूलो कोइला उत्पादक प्रान्त हो । चीनमा पर्याप्त सुरक्षा व्यवस्था नहुँदा औद्योगिक दुर्घटना सामान्य झैँ बन्दै गएको छ । गत अप्रिलमा बेइजिङको एक अस्पतालमा आगलागी हुँदा २९ जनाको ज्यान गएको थियो । बेइजिङमै एक रेस्टुराँमा ग्याँस लिक हुँदा भएको विष्फोटमा ३१ जनाले ज्याज गुमाउनु परेको थियो ।