एजेन्सी, पाैष ३ ।
चीनको उत्तर-पश्चिमी क्षेत्रमा गएराति गएको भूकम्पमा परी एक सयभन्दा बढी जनाको मृत्यु भएको छ भने दुई सयभन्दा बढी घाइते भएका छन् ।

चीनियाँ सञ्चार माध्यमकाअनुसार, सोमबार मध्यराति गन्जु प्रदेश केन्द्रबिन्दु भएर भूकम्प गएको हो । अमेरिका भू-गर्भ विभाग (यूएसजीएस)काअनुसार ५ दशमलव ९ म्याग्नेच्युडको भूकम्प गएको हो । यसको गहिराइ १० किलोमिटर रहेको जनाइएको छ ।

भूकम्पमा परी १ सय ११ जनाको मृत्यु भएको बीसीसीले जनाएको छ । त्यस्तै, २२० जना घाइते भएका छन् ।

चीनियाँ राष्ट्रपति सी चिनफिङले उद्दार कार्यमा जुट्न निर्देशन दिएका छन् । राष्ट्रपति सीले खोज र उद्दारमा सम्पूर्ण शक्ति लगाउन भनेका छन् । घाइतेको ज्यान जोगाउन समयमै उपचारको व्यवस्था गर्न पनि निर्देशन दिएका छन् ।

भूकम्प गएको क्षेत्र चीनको दुर्गम क्षेत्र पर्छ । सबै प्रदेशमध्ये यो गरिब प्रदेश रहेको छ । जसले गर्दा पनि उद्दारमा कठिनाइ भएको स्थानीय सञ्चार माध्यमले जनाएका छन् ।

भूकम्पले भत्किएका घरमा पुरिएका नागरिकको उद्दार गर्न सुरक्षाकर्मी परिचालन गरिएका छन् । साे क्षेत्र मंगोलियाको सीमासँग जोडिएको छ । चिसोका कारण पनि उद्दारमा कठिनाइ भइरहेको जनाएको छ । अहिले यो क्षेत्रको न्यूनतम तापक्रम माइनस १३ डिग्री सेल्सियसको हाराहारीमा रहेको चीनियाँ सञ्चार माध्यमले उल्लेख गरेका छन् ।

भूकम्पले ठूलठूला भवनमा क्षति पुगेको छ । थुप्रै भौतिक संरचनामा क्षति पुगेको जनाएको छ । जसले गर्दा बिजुली र पानीको आपूर्ति पनि अवरुद्ध भएको छ ।

दुई महिनाअघि पनि चीनमा भूकम्प गएको थियो । सिचुआन प्रान्तमा गएको ६ दशमलव ६ म्याग्नेच्युडको भूकम्पमा परी ६० जनाको मृत्यु भएको थियो ।

चीनमा सबैभन्दा ठूलो भूकम्प सन् १९२० मा यही क्षेत्र केन्द्रबिन्दु भएर गएको थियो । त्यतिबेला दुई लाख चीनियाँले ज्यान गुमाएका थिए ।