काठमाडौं, जेठ ८ ।
इङ्गलिस प्रिमियर लिग (ईपीएल) को फाइनल खेलमा चेल्सीले उपाधि हात पारेसँगै खेल समापन भएको छ । अन्तिम खेलमा टोटनह्याम हट्सपर दोश्रो भएको छ । हल सिटी, मिडिल्सब्रो र सण्डरल्याण्ड रेलिगेसनमा परेका छन् ।

गएराति भएको खेलसँगै यो सिजनको ईपीएल फुटबल समापन भएको हो । आइतबारको खेलपछि लिभरपुल र म्यानचेस्टर सिटी च्याम्पियन्स लिगका लागि छनौट भएका छन् । चेल्सी र टोटनह्याम यसअघि नै च्याम्पियन्स लिगका लागि छनौट भइसकेका थिए ।

आर्सनल भने च्याम्पियन्स लिगमा छनौट हुन सकेन । आर्सनलले अन्तिम खेलमा एभर्टनलाई ३–१ गोलले हराए पनि अंक तालिकामा आर्सनलभन्दा माथी रहेका सबै चार वटा टोली हिजोका खेलमा जित हात पारेपछि उसको सम्भावना सकिएको हो ।

राति भएका खेलहरूमा च्याम्पियन चेल्सीले सण्डरल्याण्डलाई ५–१ गोलले हरायो भने टोटनह्यामले हल सिटीलाई ७–१ गोल अन्तरले पराजित गरेको हो । यसैगरी म्यानचेस्टर सिटीले वाट्फोर्डलाई ५ विरुद्ध शून्य गोलले पराजित गरेको छ भने लिभरपुलले मिडिल्सब्रोलाई ३ विरुद्ध शून्य गोलले पराजित गरेको थियो । त्यसैगरी म्यानचेस्टर युनाईटेडले क्रिष्टल प्यालेसलाई २ विरुद्ध शून्य गोलले पराजित गरेको छ ।