काठमाडौं, पौष १८ ।
एकताका चर्चित गायक एवम् एड् गुरुको नामले समेत परिचित निर्मलराज पौडेल पुनः डेढ दशकपछि गायन यात्रामा पुनरागमन गरेका छन् । उनको गायनमा पुनरागमन ‘छम्म नाचौँ, छप्प नाचौँ’ बोलको गीतमार्फत् भएको हो ।

श्रब्य सामग्रीको रूपमा रहेको सो गीतको हालै दृश्य सामग्री अर्थात् म्यूजिक भिडियो छायाँकन गरिएको छ । विशेष गरेर पर्वहरूमा नाच्ने शैलीमा तयार भएको उक्त गीतमा चर्चित कलाकारहरूले अभिनय गरेका छन् ।

गीतमा वरिष्ठ कलाकारहरू सरोज खनाल, बिजय लामा, रमेश उप्रेती, किरण केसी, राजाराम पौडैल, निर्मल शर्मा, धिरेन शाक्य, रबिन्द्र खड्का, गजित बिष्ट, गम्भीर बिष्ट, सुनिल शिलवाल, खुस्बु खड्का, गोपाल ढकाल छन्दे, रोहित कार्कीलगायतका नयाँ र पुराना चर्चित कलाकारहरूले अभिनय गरेका छन् ।

विज्ञापन क्षेत्रमा लामो समयदेखि लागेका यस क्षेत्रका अगुवा पौडेल एड् गुरु नामले समेत परिचित त छ नै । उनको यो पछिल्लो गीतमा निर्मलराज पौडेलको शब्द तथा स्वर, मनिष पौडेलको निर्देशन, गम्भीर बिष्टको कोरियोग्राफी, महेश पौडेलको छायाँकन तथा माधव थापाले छायाँकन तथा व्यवस्थापन गरेका छन् । पौडेलकै रचना रहेको गीतलाई मोहित मुनालले सङ्गीत दिएका छन् । करिब ३५ वर्ष अघि हलिउड र बलिउडका विभिन्न गीतलाई नेपाली शैलीमा परिमार्जन गरी गायन यात्रा सुरु गरेका गायक पौडेलको ‘फेसन यो हो फेसन’ भन्ने गीत निकै लोकप्रिय रहेको छ । उनका ह्याप्पी लाईफ, सलल बगेको गण्डकीलगायतका गीतहरू बढी चर्चित छन् ।

हालै मात्र पौडेलले नेपालमा विज्ञापनको इतिहास र वर्तमान अवस्था समेटेर विज्ञापनको इतिवृत्तान्त र यस पेशा र क्षेत्रप्रति आफ्नो अनुभवसमेत समेटेर एक पुस्तक ‘वेलकम आरोह अवरोह’ प्रकाशन गरेका थिए । जुन श्रोताहरूले अधिक रूपमा रुचाएका पनि थिए ।