एजेन्सी, माघ २० ।
संसारमा दिनहुँ जसो अचम्मका घटनाहरू हुने गरेका छन् । यसै क्रममा अमेरिकामा केही समय अगाडि मात्र एक महिलाको कानमा आफूले पालेको सर्प आफ्नै कानको प्वालभित्र पसेपछि उकुसमुकुस भएकी थिइन् ।

ओरिगन राज्यकी ऐसली ग्लाईको कानको प्वालबाट निस्कने प्रयास गरेको सर्प त्यहीँ फसेको हो । ग्लाईले आफ्नो फेसबुक पेजमा पोष्ट गरेको तस्वीरमा उनको कानको प्वालमा सर्प झुण्डिएको स्पष्ट देखिन्छ । उनले तस्वीर पोष्ट गर्दै लेखेकी छन्, ‘मेरो जीवनको अहिलेसम्मकै सबैभन्दा बढी पागलपनले भरिएको समय । मेरो सर्प मेरै कानको प्वालमा फस्यो र यसलाई निकाल्नका लागि अस्पतालको आकस्मिक कक्षसम्म जानु पर्‍यो ।’

हातमा सर्प खेलाई रहेकै बेला उ आफ्नो कानको प्वालमा पसेको ग्लाईले बताइन् । अहिले सर्प ठीक रहेको र त्यसलाई निकाल्न कान पनि चिर्नु नपरेको उनको भनाई छ ।