काठमाडाैं, बैशाख ८ ।
पहिलो पटक दूधमा बर्ड फ्लुको भाइरस फेला परेको पुष्टि भएको छ । अमेरिकाको टेक्सासमा विश्व स्वास्थ्य सङ्गठन डब्ल्यूएचओले ‘एच फाइभ एन वान’ बर्ड फ्लु भाइरस संक्रमित जनावरको कच्चा दुधमा धेरै मात्रामा पाइएको जनाएको छ । तर, उक्त भाइरस दुधमा कति समयसम्म टिक्छ भन्ने कुरा स्पष्ट भने नभएको डब्ल्यूएचओले जनाएको छ ।

एभियन इन्फ्लुएन्जा ‘एच फाइभ एन वान’ पहिलो पटक सन् १९९६ मा देखा परेको थियो । तर, संक्रमित स्तनधारी जनावरहरूको संख्यामा वृद्धि भएसँगै २०२० पछि चराहरूमा प्रकोपको संख्या द्रूत गतिमा बढेको छ । जसका कारण लाखौँ पशुपंक्षीहरू संक्रमित भएका छन् । गत महिना गाई र बाख्रामा पनि बर्ड फ्लुको लक्षण देखिएपछि यसलाई अति संवेदनशीलकाे रूपमा विज्ञहरूले लिएका छन् ।

अमेरिकी अधिकारीहरूले यस महिनाको सुरुमा टेक्सासको डेरी फार्ममा काम गर्ने एक व्यक्ति गाईवस्तुको सम्पर्कमा आएपछि बर्ड फ्लूको सङ्क्रमित भएको पुष्टि गरेका थिए । संक्रमित जनावरको दुधमा पनि भाइरस भेटिएको र विज्ञहरूले अझै पनि दुधमा भाइरस कति समय बाँच्न सक्छ भनेर अनुसन्धान गरिरहेको जनाइएको छ ।

टेक्सासको स्वास्थ्य विभागले गाईवस्तुमा संक्रमण व्यावसायिक दुध आपूर्तिको लागि चिन्ताको विषय नभएको प्रतिक्रियासमेत दिएको छ । विश्व स्वास्थ्य सङ्गठनका ग्लोबल इन्फ्लुएन्जा कार्यक्रमका प्रमुख वेन्किङ झाङले भने, ‘टेक्सासमा भएको घटना एउटा गाईबाट एभियन इन्फ्लुएन्जाबाट मानिसमा संक्रमित भएको पहिलो घटना हो ।’