काठमाडौं, जेठ ९ ।
नेपाल सरकारले नेपालको राष्ट्रिय खेल भलिवल निर्धारण गर्ने निर्णय गरेको छ । सोमबार बसेको मन्त्रिपरिषदको बैठकले नेपालको राष्ट्रिय खेल भलिबल निर्धारण गर्ने निर्णय गरेको हो ।

नेपालले पहिले अनौपचारिक रूपमा डण्डिबियो र कबड्डीलाई राष्ट्रिय खेल दावी गरेपनि सरकारी स्तरबाट नेपालको राष्ट्रिय खेल अहिलेसम्म टुंगो लाग्न सकेको थिएन ।

नेपालमा भलिबल सानो स्थानमा खेल्न सकिने, नेपालको भौगोलिक अवस्थामाअनुसार जहापनि खेल्न सकिने र थोरै बजेटमा सम्पन्न हुने तथा सबै नेपालीको पहुँचमा पुग्न सक्ने भएकाले राष्ट्रिय खेलको मान्यता दिएको हो ।

नेपालमा राष्ट्रिय खेल भलिबललाई बनाएपनि नेपालमा भलिबल खेल्न एउटै पनि सुविधासम्पन्न कवर्डहल छैन । हाल त्रिपुरेश्वरमा भएको कवर्डहल पनि गोरखा भूकम्पले क्षतविक्षत भएको र अहिलेसम्म पुनर्निर्माण हुन सकेको छैन ।

भलिबललाई राष्ट्रिय खेल बनाउनुपर्नेमा आफूहरूको लामो समयदेखिको पहलले सार्थकता पाएको भन्दै नेपाल भलिबल संघका महासचिव जितेन्द्र चन्दले सरकारलाई धन्यबाद दिएका छन् ।

युवराज लामाले राष्ट्रिय खेलकुद परिषदको नेतृत्व संहाल्दादेखि नै नेपालको राष्ट्रिय खेल निर्धारण गर्नका लागि प्रक्रिया थालेका थिए । राष्ट्रिय खेलका लागि परिषद्मा आवद्ध सबै संघ, सरोकारवाला निकायलाई समेटेर बृहत अन्तरक्रियासमेत गरेको थियो ।

केशव विष्टले राखेपको नेतृत्वमा आएपछि राष्ट्रिय खेल निर्धारणका लागि प्रयासलाई निरन्तरता दिएका थिए । परिषदले भलिबल, तेक्वान्दो लगायतका केहि खेलहरूको नामावलीमा एकलाई निर्धारण गर्न खेलकुद मन्त्रालयलाई सुझाव दिएको थियो ।