काठमाडौं, माघ २१ ।
सरकारले स्थानीय निकाय निर्वाचनको तयारीका लागि समय निर्धारणसहितको पत्र आज पठाउने भएको छ । बिहीबारको मन्त्रिपरिषद्को निर्णयअनुसार आयोगले निर्वाचन आयोगलाई आज पत्र पठाउने प्रधानमन्त्रीको सचिवालयले जनाएको छ । सरकारले नयाँ वर्ष २०७४ बैशाख मसान्तदेखि जेठको पहिलो हप्ता निर्वाचनको तयारी गर्न पत्र पठाउने निर्णय गरेको छ ।

निर्वाचनको प्रक्रिया अगाडि बढाउन आयोगलाई सजिलो पार्ने उद्देश्यले पत्र पठाउने निर्णय गरेको उद्योगमन्त्री नविन्द्रराज जोशीले बताएका छन् । उनकाअनुसार आयोगलाई भनेको समयभित्रै केही दिनमा एकीन मिति पनि तोकिनेछ । स्थानीय निर्वाचनको वातावरण बनाउन सबै दलहरूसँग वार्ता गर्ने निर्णय पनि मन्त्रिपरिषद्ले गरेको छ ।

पुनःसंरचना आयोगको प्रतिवेदनबारे पनि आजैदेखि अध्ययन थाल्ने मन्त्री जोशीले बताए । अध्ययनको लागि मन्त्री पाण्डेको संयोजकत्वमा मन्त्री दीपक बोहरा र नविन्द्रराज जोशी सम्मिलित समिति गठन गरेको छ ।