काठमाडाैं, जेठ १८ ।
नेपाल राष्ट्र बैंकबाट ‘क’ वर्गकाे इजाजत पत्र प्राप्त संस्था माछापुच्छ्रे बैंक लिमिटेडले सल्यान जिल्लामा रहेकाे त्रिभुवन जनमाध्यामिक विद्यालयमा खानेपानी पूर्वाधार निर्माण गरी हस्तान्तरण गरेको छ ।

बैंकले आफ्नो सामाजिक उत्तरदायित्वअन्तर्गत कर्णाली प्रदेशको सल्यान जिल्लास्थित शारदा नगरपालिका वडा नं.-१५, माल्नेटामा रहेको उक्त विद्यालयलाई त्रिभुवन जनमाध्यामिक विद्यालयमा खानेपानी पूर्वाधार निर्माण गरी सहयोग गरेको हो ।

बैंकले बुधबार विद्यालयमा आयोजित एक औपचारिक कार्यक्रमकाबीच उक्त खानेपानी पूर्वाधार निर्माण गरी हस्तान्तरण गरेको हो ।

विद्यालय सञ्चालनका लागि अति आवश्यक पर्ने खानेपानीका अभावका कारण पठन-पाठनमासमेत समस्या परिरहेको जानकारी पाएपश्चात् बैंकले उक्त विद्यालको अवस्था अवलोकन गरी उक्त पूर्वाधारहरू निर्माण गरिदिएको हो ।

२ सय ८९ जना विद्यार्थीहरू तथा १८ जना शिक्षक/कर्मचारी कार्यरत त्रिभुवन जनमाध्यामिक विद्यालयले ३५०० मिटर टाढा रहेको मुहानबाट अस्थायी रूपमा पानीको पाइप जडान गरेर खानेपानीको व्यवस्था गर्दै आएकोमा खडेरीको समयमा पानी सुक्ने, डढेलो लागेको बेलामा पानीको पाइप जलेर आपूर्ति बन्द हुने लगायतका समस्या रहेको थियो ।

उक्त समस्यालाई मध्यनजर गर्दै बैंकले स्थायी रूपमा खानेपानी आपूर्तिका लागि मुहानमा ट्याङ्की निर्माण गर्नुका साथै विद्यालय परिसरमा धाराको निर्माण गरेर उक्त निर्माण गरिएका पूर्वाधारहरू विद्यालय व्यवस्थापन समितिलाई हस्तान्तरण गरेको हो । बैंकले करिब २ महिनाको अवधिमा उक्त पूर्णधारहरू निर्माण गरेको थियो ।

बैंकले आफ्नो संस्थागत सामाजिक उत्तरदायित्वअन्तर्गत देशका विभिन्न स्थानहरूमा विभिन्न संघ-संस्थाहरूसँग मिलेर स्वास्थ्य, शिक्षा, पूर्वाधार निर्माण, वित्तीय साक्षरता, दीगो विकासलगायतका क्षेत्रहरूमा काम गर्दै आइरहेकाे बैंकले एक प्रेस विज्ञप्ति जारी गरी जनाएकाे छ ।