काठमाडाैं, जेठ २२ ।
हिमालयन लाईफ इन्स्योरेन्स लिमिटेडले १६ औँ वार्षिकोत्सवको अवसरमा आइतबार सातै प्रदेशमा विविध कार्यक्रमकाे आयाेजना गरी सम्पन्न गरेको छ । सोही अवसरमा कम्पनीले विभिन्न आश्रम तथा विद्यालयका विद्यार्थीहरूलाई खाद्यान्न र स्टेशनरी सामाग्री वितरण गरेको छ ।

कम्पनीले कोशी प्रदेशअन्तर्गत विराटनगरमा पुर्वाञ्चल बाल सेवा आश्रमलाई स्टेशनरी तथा विराटेश्वर वृद्धाश्रमलाई निर्माण सामाग्री, बिर्तामोडस्थित नमस्ते बाल तथा वृद्धा आश्रमका बालबालिकाहरूलाई शैक्षिक सामाग्री र वृद्धवृद्धाहरूको लागि खाद्यान्न वितरण गरेको छ । कम्पनीले मधेश प्रदेशअन्तर्गत जनकपुरस्थित रामजानकी वृद्धाश्रम, बर्दिबासस्थित भुवनेश्वरी वृद्धाश्रम र वीरगञ्जस्थित मानव सेवा आश्रममा खाना खुवाउने कार्यक्रम सम्पन्न गरेको छ ।

यसैगरी, वागमती प्रदेशअन्तर्गत अपाङ्ग पुनःस्थापना केन्द्र गोकर्णमा खाद्यान्न वितरण, चितवन देवघाटस्थित रामजानकी आश्रममा शैक्षिक सामाग्री वितरण गरिएको छ भने गण्डकी प्रदेशअन्तर्गत बागलुङको मानव सेवा आश्रममा खाना खुवाउने, लमजुङ बेसीशहरस्थित लमजुङ विद्यालयका ४० जना विद्यार्थीहरूलाई स्टेशनरी वितरण, पोखरास्थित वल्डएज होममा खाद्यान्न वितरण गरेको छ ।

लुम्बिनी प्रदेशअन्तर्गत बुटवलस्थित अपाङ्ग आश्रममा खाद्यान्न वितरण, नेपालगञ्ज, पाल्पा र घोराहीस्थित निलसागर सेवा आश्रमका वृद्धावृद्धाहरूलाई खाद्यान्न वितरण, कपिलवस्तुस्थित कैलाश आश्रममा खाना खुवाउने कार्यक्रम सम्पन्न गरेको छ भने कर्णाली प्रदेशको सुर्खेतस्थित मानव सेवा आश्रममा खाना खुवाउने कार्यक्रम सम्पन्न भएको छ । त्यस्तै, सुदूरपश्चिम प्रदेशअन्तर्गत टीकापुरस्थित साहारा घर, डडेल्धुरास्थित उग्रतारा संस्कृत विद्यालय, झलारीस्थित विद्यालयमा र धनगढीस्थित परिवार बाल गृहमा खाद्यान्न तथा विद्यार्थीहरूलाई स्टेशनरी सामाग्री वितरण गरिएको छ ।

हिमालयन लाईफ इन्स्योरेन्स स्थापना भएको आज मंगलबार १६ वर्ष पूरा भएकाे छ । साबिकको प्राइम लाईफ, गुराँस लाईफ र युनियन लाईफ इन्स्योरेन्स कम्पनी लिमिटेड मर्ज भई हिमालयन लाईफ इन्स्योरेन्स बनेको हो ।