काठमाडाैं, जेठ २३ ।
आइजीआई प्रुडेन्सियल इन्स्योरेन्स लिमिटेडले विश्व वातावरण दिवसको अवसरमा आज बुधबार ५ मे २०२४ का दिन बिहान ६ बजे कम्पनीको केन्द्रीय कार्यालय, नारायणचौर, नक्साल, काठमाडाैंबाट सुरु गरी नारायणचौर, नक्साल भवगती बहाल, चारखाल, पुतलीसडक, प्रदर्शनीमार्ग भद्रकाली, माईतीघर, त्रिपुरेश्वर, रत्नपार्कबाट दरबारमार्ग हुँदै पुनः नारायणचौरसम्म साइकल र्‍यालीको आयोजना गरी वातावरणलाई स्वच्छ राखौँ, हाम्रो धर्ती हाम्रो जीवन, नेपाल आमाको जय होस्, जीवनभर वातावरण मैत्री कार्यमा हात बढायौँ, प्रकृति प्रेमीलाई जीवनभर दुःख हुँदैन, सफा आकाश र सफा हृदय मानिसको पहिचान हो जस्ता नारासहित विश्व वातावरण दिवस भव्य र सभ्यताका साथ मनाएकाे छ ।

उक्त कार्यक्रममा कम्पनीका प्रमुख कार्यकारी अधिकृत युगेशभक्त वादे श्रेष्ठलगायत कर्मचारीहरू, अभिनेत्री-साहसी पर्वतारोही तथा समाजसेवी छिरिङ्ग शेर्पा, लायन्स क्लब अफ काठमाडाैं पिस आइडलका पदाधिकारी तथा प्रतिनिधिहरू तथा स्पार्क ग्रुपका प्रतिनिधिहरूको उल्लेख्य उपस्थिति रहेकाे थियो ।

वातावरण दिवसको अवसरमा नेपालको इतिहासमा पहिलो पटक निर्जीवन बीमाको तर्फबाट आइजीआई प्रुडेन्सियल इन्स्योरेन्स लिमिटेडका कर्मचारीहरूले नारायणचौरमा नेपालको झण्डाको साथमा मानव निर्मित कम्पनीको लोगो बनाएर हर्षाेल्लासका साथ साइकल र्‍यालीमा सहभागी भएका थिए ।

उक्त कार्यक्रमको समापन समारोहका अवसरमा कम्पनीका प्रमुख कार्यकारी अधिकृत युगेशभक्त वादे श्रेष्ठले वातावरण जोगाऊ, साइकलको प्रयोग गरौँ, स्वस्थ्य भएर जीवन जिउँ भन्ने भावका साथ लायन्स क्लब अफ काठमाडाैं पिस आइडियलका प्रतिनिधिहरूलाई विभिन्न जातजातका बिरुवाहरू हस्तान्तरण गरेका थिए । निर्जीवन बीमाको क्षेत्रमा आइजीआई प्रुडेन्सियल सबैभन्दा ठूलो बीमा कम्पनी हो । कम्पनीले सम्पत्ति, सामुद्रिक मोटर, इञ्जिनियरिङ, हवाई, कृषि तथा पशुपंक्षी, स्वस्थ्य, लघुलगायत थुप्रै विविध बीमाहरूमार्फत् देशको सात वटै प्रदेशहरूमा रहेका ८० भन्दा बढी शाखा तथा सम्पर्क कार्यालयहरूबाट ग्राहक महानुभावहरूलाई सेवा प्रदान गरिरहेको छ । पछिल्लो समय बीमालेख जारी तथा दाबी भुक्तानीलाई सहज र सरल बनाउँदै कम्पनीले अनलाईन बीमा सेवासमेत सुरु गर्दै आएको छ ।
उक्त कार्यक्रम सामाजिक क्षेत्रमा कार्य गर्दै आएको लायन्स क्लब अफ काठमाडाैं पिस आइडल र स्पार्क ग्रुपको सहकार्यमा सम्पन्न भएकाे थियो । कार्यक्रममा लायन्स क्लब अफ काठमाडाैं पिस आइडलका अध्यक्ष शिव श्रेष्ठले यस्ता कार्यक्रमहरूले युवा वर्गमा वातावरण संरक्षणसहित स्वस्थ्य जीवनशैलीतर्फ आकर्षण गर्न मद्दत पुग्ने विश्वास व्यक्त गरे ।