काठमाडाैं, जेठ २४ ।
ललितपुर महानगरपालिकाका प्रमुख चिरीबाबु महर्जनले नगरबासीको गुनासो, सुझाव र समस्या तत्काल सुनुवाइ गर्नका लागि ‘घर-घरमा नगर प्रहरी’ परिचालन कार्यक्रमको सुरुवात गरेका छन् ।

आज बिहीवार ‘सुन्दर ललितपुर नगरी, घर-घरमा नगर प्रहरी’ परिचालन कार्यक्रमको सुरुवात गर्दै उनले नगरबासीको सुनुवाइ गरी सोही अनुसारको सेवा प्रवाह गर्नको लागि ललितपुर महानगरपालिकाले याे कार्यक्रम ल्याएको बताए ।

उनले भने, ‘यो कार्यक्रमलाई अगाडि बढाउँदै गर्दा यसबाट नगर प्रमुख मात्र होइन वडा अध्यक्ष, सदस्यहरूलाई अभियानले धेरै नै सहयोग प्राप्त हुनेछ भन्ने आश गरेको छु । यो कार्यक्रम भव्यताका साथ सफल हुन्छ । यसले नगरपालिका र नगरबासीको बीचमा सेतुको काम गर्नेछ । यसबाट दुई पक्षीय संवाद हुन्छ । नगरबासीहरूको सुख, दुःख र पीर आदिको बारेमा महानगरपालिका र जनप्रतिनिधिहरू सुसूचित हुने मौका पाउनेछ ।’

यसका साथै उनले अभियानको बारेमा नेपाल सरकारका सुरक्षा निकायहरूसँग समन्वय गरेर अगाडि बढ्ने जानकारी दिँदै अभियानले सेवा चुस्त र दुरुस्त हुने बताए । उनले भने, ‘यसबारेमा नेपाल सरकारका सुरक्षा निकायहरूसँग पनि हामी समन्वय गरेर हामी अगाडि बढ्छौँ । जसले गर्दा हाम्रो सेवा चुस्त र दुरुस्त हुने नै छ ।’