काठमाडाैं, जेठ २४ ।
प्रमुख प्रतिपक्षी दल नेपाली कांग्रेसका महामन्त्री विश्वप्रकाश शर्माले सरकारको कमी-कमजोरीकै कारणले क्रिकेटर सन्दीप लामिछानेको भिसा नलागेको बताएका छन् ।

आज बिहीबार प्रतिनिधि सभाको बैठकमा विशेष समयमा बोल्दै महामन्त्री शर्माले सन्दीप लामिछानेको भिसा नलागेको बारेमा परराष्ट्रमन्त्री र खेलकुदमन्त्रीसँग जवाफसमेत माग गरेका छन् ।

महामन्त्री शर्माले अदालतले निर्दोष साबित गरेपछि पनि क्रिकेटर सन्दीप लामिछाने विश्वकप खेल्न जान नपाएको भन्दै अमेरिका जान नपाउनुमा कहाँ कमजोरी भयो भनी परराष्ट्रमन्त्री र खेलकुदमन्त्रीसँग जवाफ माग गर्दै उनले अदालतले गरेको फैसला सुसूचित गराएर भिसाको लागि वातावरण बनाउनुपर्नेमा सरकारले त्यसो गर्न नसकेको दाबीसमेत गरेका छन् ।

उनले भने, ‘नेपाली क्रिकेट टीम यसबेला विश्वकपको मैदानमा रहेका छन् । समग्र नेपाली कांग्रेस पार्टी र मेरो व्यक्तिगत तर्फबाट म हाम्रा उत्साही खेलाडीहरूलाई शुभकामना व्यक्त गर्न चाहन्छु । हिजो आरोप लागिरहेको बेला शीरमा मुद्दा बोकेर मैदानमा उत्रिनु हुन्न हामी कयौंले भन्यौँ । तर, सम्मानित अदालतले निर्दोष साबित गरिसकेपछि यस बेलामा सन्दीप लामिछाने विश्वकपको मैदानमा हाम्रो प्रतिनिधित्व गरेर खेलिरहनु भएको अवस्था हुनुपर्थ्याे । आफ्नो खेलाडीको बारेमा अदालतले गरेको फैसला सुसूचित गरेर उनको भिसाको लागि वातावरण बनाउन सरकारले उचित पहल समयमै गर्नु पर्दथ्यो। यसमा कमजोरी कहाँ रह्यो ? यो किन कमजोरी भयो ? खेलकुदमन्त्री, परराष्ट्रमन्त्री र समग्र सरकारको यस बारेमा म सभामुख महोदयमार्फत् ध्यानाकर्षण गराउन चाहन्छु ।’