काठमाडाैं, जेठ २७ ।
नेपाल खेलकुद महासंघले नेपाल त्रिकेट संघ (क्यान)का अध्यक्ष चतुरबहादुर चन्दको राजीनामा माग गरेको छ ।

काठमाडौंमा आज आइतबार एक पत्रकार सम्मेलनकाे आयाेजना गरी महासंघले अध्यक्ष चन्दको राजीनामा माग गरेको हो । क्यान अध्यक्ष चन्द अन्तर्राष्ट्रिय क्रिकेट परिषद् (आईसीसी) ले नेपाललाई विश्वकपका लागि प्रदान गर्ने १५ खेलाडी र १० सपोर्टिङ स्टाफमध्ये प्रशिक्षण समयदेखि अनिवार्य रूपमा हुनुपर्ने टीम डाक्टरलाई टीममा नराखी उक्त स्थानमा आफू र श्रीमतीसहित अमेरिका पुगेको भन्दै नैतिकताका आधारमा पनि राजीनामा दिन र राजीनामा नगरे कारबाही गर्न युवा तथा खेलकुद मन्त्रालयको ध्यानाकर्षणसमेत गराएको छ ।

खेलाडीहरूलाई अमेरिकामा अध्यक्ष चन्दले चन्दा उठाउने हेतुले राति-राति होटेलमा खेलाडीहरूलाई उभ्याएको र फोटो खिचाउने काममा लागाएको आरोप लगाउँदै यसबारे सत्यतथ्य छानबिन गर्न पनि महासंघले माग गरेको छ ।

पत्रकार सम्मेलनमा महासंघका केन्द्रीय सचिव विप्लव घोषले विश्वकप अगाडि क्यान अध्यक्ष चन्दको मिलेमतोमा क्यानका सचिव पारस खड्का अमेरिका पुगेर नेपाली खेलाडीले हस्ताक्षर गरेको ब्याट र टि-सर्ट अक्सनमा राखेर बेचेको, अमेरिकामा बसोबास गर्ने नेपालीहरूले चन्दा उठाएर उपलब्ध गराएको रकम हालसम्म क्यानको बैंक खातामा दाखिला नभएको क्यानका स्वयं पदाधिकारी एवं केन्द्रीय सदस्यहरूले कुरा उठाएको बताए ।

यसबारे अविलम्ब छानबिन गरी दोषीमाथि कारबाही गर्न घोषले मागसमेत गरेका छन् । उनले सन्दीप लामिछाने नेपालका उत्कृष्ट खेलाडी भएर पनि नेपालको १५ सदस्यीय टोलीमा समेटिन नसकेको बारेमा पनि अविलम्ब छानबिन गर्न माग गरे ।

अमेरिकामा फेम नेपाल नामक संस्थाले क्यानका अध्यक्ष चन्द र उनको श्रीमतीलाई ट्याङ आउट स्पोर्ट्स बार, इर्भिङमा खुवाएबापत र खेलाडीलाई एकछिन बसाएबापत खेलाडीलाई भेट्न गएका व्यक्तिहरूसँग टिकटको मूल्य ३५ डलर गैरकानूनी रूपमा उठाएको, ८० डलरको गेमको टिकटलाई १३५ डलर लिएर नेपाली दर्शकलाई ठगेको आरोप पनि महासंघले लगाएको छ ।

विश्वकपको सन्दर्भमा विभिन्न व्यक्तिलाई अमेरिका पठाउने भन्दै भिसा प्रकियाका लागि प्रधानमन्त्री कार्यालयको लेटर प्याड प्रयोग गरेर ती व्यक्तिहरूबाट रकम उठाई मानव तस्करी गर्न लागेको र यस कार्य क्यानका पदाधिकारीको मिलेमतो बिना असम्भव रहेको भन्दै छानबिनको मागसमेत गरिएको छ ।