२३ वर्षीय युवाकाे हत्यामा संलग्न भएकाे आराेपमा एक ग्याङस्टार पक्राउ

प्रकाशित मिति: २८ जेष्ठ २०८१, सोमबार १९:०८


एजेन्सी, जेठ २८ ।
एक २३ वर्षीय युवाको हत्यामा संलग्न रहेकाे आरोपमा हङकङ प्रहरीले एक ग्याङस्टारलाई पक्राउ गरेको छ । पक्राउ परेका ती व्यक्तिबारे प्रहरीले पूर्ण विवरण भने सार्वजनिक गरेकाे छैन ।

एक सार्वजनिक अस्पतालको बाहिर शरीरभरी चोटैचोट रहेको अवस्थामा ती युवा फेला परेका थिए ।

स्थानीय प्रहरीकाअनुसार ती युवालाई नर्थ डिस्ट्रिक्ट हस्पिटल बाहिर दुई जनाले एउटा कारबाट बाहिर निकाल्दै पो किन रोडको सडकपेटीमा शनिबार बिहान ५ः४५ बजे फालेको सेक्युरिटी फुटेजमा देखिएको थियो ।

पीडित युवा साउ माउ पिङमा बस्ने भएको खुलेको छ । उनलाई सोही दिन बिहान ६ः४१ बजे गम्भीर घाइते अवस्थामा उपचारका लागि शेयुङ शुईस्थित अस्पताल लगिए पनि मृत्यु भइसकेकाे प्रहरीले जनाएकाे छ ।

उनको मृत्युको कारण धेरै पिटाइ र केही वस्तुको प्रहारबाट भएको देखिएको छ ।

आइतबार राति ७ बजे प्रहरीले घटनामा संलग्न कार पाट हेयुङको वङ चक यूएनमा फेला पारेको थियो ।

अनुसन्धानका क्रममा कारभित्र रगतका थोपा र बन्दुक फेला परेको र कार नम्बर पनि नक्कली रहेको पाइएको छ ।

उक्त कार ३२ वर्षीय व्यक्तिको भएको खुलेपछि उनलाई हत्या आरोपमा पक्राउ गरिएको हो । पक्राउ परेका व्यक्तिको पृष्ठभूमिसमेत अपराधमा संलग्न फेला परेको बताइएको छ ।

आर्थिक विवादमा हत्या भएको प्रहरीको शंका रहेकाे छ । अनुसन्धान जारी भएकाले पीडित र आरोपीबीचको सम्बन्ध खुल्न बाँकी रहेको स्थानीय प्रहरीले उल्लेख गरेकाे छ ।


प्रतिक्रिया

ताजा खबर

More