एजेन्सी, जेठ ३१ ।
भारतको मुम्बईमा एउटा अनौठो घटना सार्वजनिक भएको छ । एक जना डाक्टरले अनलाइन अर्डरमार्फत् प्राप्त भएकाे आइसक्रिमको कनमा मान्छेको औँला फेला पारेका छन् ।

याे घटना बुधबारकाे हाे । रिपाेर्टअनुसार एक महिलाले एक ग्रोसरी डेलिभरी एपमार्फत् अन्य सामानसँगै आइसक्रिम पनि अर्डर गरेकी थिइन् । उक्त आइसक्रिम खाने क्रममा ती महिलाका दाजु ओर्लेम ब्रेन्दन सेराओले मान्छेको औंला फेला पारेका हुन् ।

२६ वर्षीय सेराओ पेशाले एक एमबीबीएस डाक्टर हुन् । उनले बटर स्कच आइसक्रिम आधा जति खाइसकेपछि जिब्रोमा केही अनौठो चिज महशुस गरे । जब उनले नजिकबाट नियालेर हेरे, आइसक्रिमभित्र मान्छेको औँला पाए । त्यसपछि उनले तत्कालै यो विषयमा आइसक्रिम कम्पनीको इन्स्टाग्राम पेजमा गएर गुनासो टिपाए ।

तर, कम्पनीबाट कुनै प्रतिक्रिया आएन । त्यसपछि उनले उक्त घटनाबारे प्रहरीलाई जानकारी गराए । यो घटनाको प्रारम्भिक छानबिनको क्रममा रहेको प्रहरीले आइसक्रिममा भेटिएको वस्तु मान्छेकै औँला भएको बताएको छ । प्रहरीले अहिले उक्त औँला फरेन्सिक जाँचका लागि पठाएको छ ।

“मलाद पश्चिममा बस्ने २६ वर्षका एक एमबीबीएस डाक्टरले युम्मो कम्पनीको बटर स्कच आइसक्रिमविरुद्ध दर्ता उजुरी दायर गरेका छन् । दिउँसोको खानापछि आइसक्रिम खाने क्रममा उनले नङसहितको आधा इञ्च लामो मासु भेट्नु भएछ,” प्रहरीलाई उद्धृत गर्दै एजेन्सीले लेखेको छ ।

प्रहरीले युम्मो आइसक्रिम कम्पनीविरुद्ध मुद्दा दायर गरेको छ । “उक्त मासुको टुक्रालाई मान्छेको औँला भएको शङ्का गरिएको छ, जसलाई मानव अङ्ग भए/नभएको यकिन गर्न फरेन्सिक परीक्षणका लागि पठाइएको छ,” साे घटनालाई लिए थप अनुसन्धान भइरहेकाे प्रहरी अधिकारीले जनाएका छन् ।