काठमाडाैं, जेठ ३२ ।
नेपालले टी-२० विश्वकपअन्तर्गत भोलि शनिबार बिहान दक्षिण अफ्रिकासँग कडा प्रतिस्पर्धा गर्ने भएका छन् ।

समूह डी अन्तर्गत नेपालले भोलि बिहान नेपाली समयअनुसार सवा ५ बजेदेखि दक्षिण अफ्रिकासँग खेल खेल्न लागेको हो । यो खेल सेन्ट भिसेन्टस्थित अरनोस भाल स्टेडियममा हुँदैछ ।

जारी टी-२० विश्वकपमा दक्षिण अफ्रिकाले तीन खेलमा लगातार जित हासिल गर्दै सुपर आठमा पुगिसकेको छ । दक्षिण अफ्रिकाले यसअघि श्रीलंका, बंगलादेश र नेदरल्याण्डसलाई पराजित गरेको थियो ।

त्यस्तै, नेपालले भने पहिलो खेलमा नेदरल्याण्डससँग हार बेहोरेको थियो भने श्रीलंकाविरुद्धको दोश्राे खेल वर्षाका कारण रद्द हुन पुग्दा दुबै टीमले एक-एक अंक बाँडेको थियो । नेपालका लागि सुपर आठमा पुग्न यो खेल जित्नै पर्ने अवस्था रहेको छ । यस खेलमा हार बेहोरेमा नेपाल सुपर आठमा पुग्न असफल हुनेछ ।

दक्षिण अफ्रिका र नेपाल सिनियर तहमा पहिलो पटक अन्तर्राष्ट्रिय क्रिकेट खेल्न लागेका हुन् ।