काठमाडाैं, असार ४ ।

नेशनल लाईफ इन्स्योरेन्स लाजिम्पाटले काठमाडाैंमा असार ३ र ४ गते आफ्ना वरिष्ठ कर्मचारीहरूका लागि स्वस्थ्य र सन्तुलित जीवन प्रबर्द्धन गर्ने प्रयोजनले एक बहुआयामिक प्रशिक्षण प्रदान गरेको छ ।

यो प्रेरणादायी प्रशिक्षणबाट कर्मचारीहरूको व्यक्तिगत एवं व्यावसायिक विकास हुने र कम्पनीको लागिसमेत उपयोगी हुने अपेक्षा गरिएको छ । विविध पक्षलाई समेटेर तयार गरिएको यो प्रशिक्षणबाट व्यक्ति र संस्था दुबैको व्यावसायिकतामा वृद्धि हुने र कर्मचारीहरूलाई स्वस्थ्य वातावरणमा नवीनतम् ढङ्गले कार्य गर्न उत्प्रेरित गरी आफ्नो व्यक्तित्व विकासमा प्रेरणा प्रदान गर्नेछ ।

तालिमको नेतृत्व आर्ट अफ लिभिङ्ग नेपालका कर्पोरेट कार्यक्रम निर्देशक नीभा एम प्रधानले गरेकी थिइन् । प्रधान एक सम्मानित अन्तर्राष्ट्रिय कर्पोरेट प्रशिक्षकसमेत हुन्, जसको बैंकिङ्ग क्षेत्रमा उच्च व्यावसायिक पृष्ठभूमि रहेको छ । कर्जा पोर्टफोलियोहरू प्रबन्ध गर्न र व्यवस्थापन तालिमहरू सञ्चालन गर्न उनीमा विशेषज्ञता छ । उनको विशेषज्ञता र अनुभवले यो कार्यक्रमलाई सफल पार्न बहुमूल्य सहयोग प्रदान गरेको छ । साथै यस कार्यक्रममा वरिष्ठ प्रशिक्षक अच्युत गौतम र सम्झना खरेलले पनि सहयोगी भूमिका निर्वाह गरेका थिए ।
आर्ट अफ लिभिङ्गसँग यस्ता कार्यक्रमहरूसम्बन्धी ४० वर्षभन्दा बढी समयावधिको सफल अनुभव रहेको र विश्वभरका लगभग १ सय ८६ वटा देशहरूमा यी कार्यक्रम कार्यान्वयन गरिएको छ । यी कार्यक्रमहरू विश्व स्वास्थ्य संगठनको वेलनेश मोडेलसँग मेल खाने हिसाबले तयार गरिएको छ । यस कार्यक्रमबाट सहभागीहरूलाई रोग र तनाव मुक्त गरी समग्र स्वास्थ्य र कल्याणलाई हाैसला प्रदान गर्नुका साथै कर्मचारीहरूमा उनीहरूको मानसिक अवस्था, कार्य सम्पादन, ऊर्जास्तर, निर्णय लिने, समय व्यवस्थापनमा उल्लेखनीय सुधारहरू हुनेमा कम्पनी विश्वस्त रहेको छ ।

नीभा एम प्रधानकाअनुसार “कर्मचारीहरूलाई प्राथमिकता दिने संस्थाहरूको बढ्दो संख्या देखेर हामी हर्षित छौँ । हाम्रो समग्र प्रशिक्षण प्याकेज व्यक्ति र संस्था दुबैको लागि अधिकतम र दीगो फाइदाहरू प्रदान गर्ने हिसाबले बनाइएको छ । समय तथा लगानीको अधिकतम परिणामको सुनिश्चित गर्न कार्यक्रम सम्पन्न भएपश्चात् थप तालिम सत्रहरू सञ्चालन गर्न संस्था प्रतिबद्ध छ ।”
कार्यक्रमको समापन समारोहमा कम्पनीका अध्यक्ष प्रेमा राज्यलक्ष्मी सिंह साथै आर्ट अफ लिभिङ्ग नेपालका अध्यक्ष सिद्धेश्वर कुमार सिंहलगायत व्यक्तिहरूकाे उपस्थिति रहेका थियो ।

नेशनल लाईफ इन्स्योरेन्स कम्पनीको सफलताको लागि स्वस्थ उत्प्रेरणा आवश्यक छ भन्ने मान्यता राख्दै आफ्ना कर्मचारीहरूलाई यस्तो उच्चस्तरको तालिम प्रदान गर्न पाउँदा कम्पनी गौरवान्वित रहेकाे कम्पनीले एक प्रेस विज्ञप्ति जारी गरी जनाएकाे छ ।