एजेन्सी, असार ७ ।
भारतको हिमाञ्चल प्रदेशको सिम्लामा आज शुक्रबार बिहान भएको बस दुर्घटनामा परी चार जनाको मृत्यु भएकोमा दुई नेपाली परेका छन् ।

हिमाञ्चाल प्रदेश रोड ट्रान्सपोर्ट कर्पोरेशन (एचआरटीसी)को सो बस दुर्घटनामा मृत्यु हुनेमा चालक करम दास, सह-चालक राकेश कुमार तथा दुई नेपाली यात्रु वीरमा देवी र धन शाह भएको जनाइएको छ ।

चालक र सह-चालकको घटनास्थलमै मृत्यु भएको हो । सो बस जुबल सब स्टेशन सिम्लामा दुर्घटनामा परेको थियो । बिहान पाैने ७ बजेकाे समयमा भएको बस दुर्घटनामा चालक र सह-चालकबाहेक पाँच यात्रु भएको एचआरटीसीका प्रबन्ध-निर्देशक रोहनचन्द ठाकुरले जनाएका छन् ।

सो बस कुडडुबाट गिल्टारी गाउँतर्फ जान लाग्दा दुर्घटनामा परेको थियो । सो दुर्घटना जियेन्दर रंगता, दीपिका ठाकुर र हस्तबहादुर गम्भीर घाइते छन् । उनीहरूको स्थानीय रोहरु अस्पतालमा उपचार भइरहेको स्थानीय समाचार एजेन्सीले उल्लेख गरेकाे छ ।