काठमाडाैं, असार ११ ।
डाँका चोरी तथा लुटपाट गरी फरार रहेका चार जना व्यक्तिहरूलाई प्रहरीले पक्राउ गरी सार्वजनिक गरेको छ ।

आज मंगलबार काठमाडौं उपत्यका अपराध अनुसन्धान कार्यालयले डाँका चोरी तथा लुटपाट गरी फरार रहेका चार जनालाई पक्राउ गरी सार्वजनिक गरेको हो ।

पत्रकार सम्मेलनमा बोल्दै प्रहरी वरिष्ठ उपरीक्षक सानुराम भट्टराईले असार ४ गते भक्तपुर सूर्यविनायक नगरपालिका-४ दधिकोट बस्ने ३५ वर्षीय डिल्लीबहादुर राउतको घरमा अपरिचित तीन जना व्यक्तिहरू प्रवेश गरी सीबीआई हुँ भन्दै घरधनी र सदस्यहरूलाई नियन्त्रणमा लिएर दराजभित्र रहेको २ करोड नेपाली रुपैयाँ डाँका चोरी तथा लुटपाट गरी फरार रहेको बताए ।

उक्त घटनामा संलग्न रहेका सुजन रसाईलीसहित चार जनालाई पक्राउ गरी आवश्यक अनुसन्धान तथा कारबाहीको लागि जिल्ला प्रहरी परिसर भक्तपुर पठाइएको बताए ।

पक्राउ पर्नेमा ३० वर्षीय सिन्धुपाल्चोक बाह्रबिसे-२ का सुजन रसाईली, सिन्धुपाल्चोक भोटेकोशी-२ का ३१ वर्षीय भीमबहादुर तामाङ, ३६ वर्षीय ओखलढुंगा मानेभञ्ज्याङ-३ का मुनाराज राई र ३८ वर्षीय सिन्धुपाल्चोक भोटेकोशी-२ कै कृष्णबहादुर बोहरा रहेको प्रहरीले जनाएको छ ।

डिल्लीबहादुर राउतको मामा कुलबहादुर खत्रीलाई राउतको घरमा बढी मात्रामा रकम रहेको भन्ने जानकारी भएकोमा निज खत्रीले वैदेशिक रोजगारको काम गर्ने सिलसिलामा चिनेका सुजन रसाईलीलाई उक्त कुरा जानकारी गराइ लुट्ने योजना बनाएको पाइएको प्रहरीले बताएको छ ।

प्रहरीले निजहरूबाट ३६ लाख ३६ हजार, घटनामा प्रयोग भएको बा. प्र. ०२-०४० प.५५३८ र बा. प्र. ०२-०३३ प ६१७४ नम्बरको २२० सिसिको पल्सर मोटरसाइकल २ थान, मोबाइल थान १०, लुटिएको रकम बोक्न प्रयोग गरिएको झोला थान २, डाँका चोरी तथा लुटपाट गर्न लगाएको कपडाहरू, डाँका चोरी तथा लुटपाट गर्दा लगाएको जुत्ता ३ जोर, खुकुरी एक थान बरामद भएको बताएको छ ।