एजेन्सी, असार १२ ।
कर वृद्धि गर्ने कानूनको विरोध गर्दै केन्याली नागरिकहरूले प्रदर्शन गरेका छन् । कर वृद्धि कानून ल्याएको भन्दै नागरिकहरूले विरोध प्रदर्शन गरेका हुन् । आर्थिक सङ्कटको सामना गरिरहेका बेला सरकारले संसद् भवनभित्र करवृद्धिसम्बन्धी विधेयक पारित गर्न लागेकाले संसद् बाहिर नागरिकले प्रदर्शन गर्न थालेका हुन् । प्रदर्शन हिंसात्मक बन्दै गएपछि उनीहरू बलपूर्वक संसद् भवनभित्र प्रवेश गर्न खोजेपछि प्रहरीले रोकेको थियो ।

अनियन्त्रित भिडमा रहेका प्रदर्शनकारीहरूले संसद् भवनको केही भागमा आगो लगाइदिएका बीबीसीले जनाएको छ । भिड नियन्त्रणका लागि प्रहरीले चलाएको गोली लागेर पाँच जना प्रदर्शनकारीको ज्यानसमेत गएको छ । अरू ५० जनाभन्दा धेरै प्रदर्शनकारीहरू घाइते भएका छन् । अश्रु ग्याँस र पानीको फोहोरा प्रयोग गर्दा पनि प्रदर्शनकारी पछाडि नहटेपछि गोली चलाएको प्रहरीले जनाएको छ ।