काठमाडाैं, असार १९ ।
मिरा राई इनिसियटिभको सहकार्यमा होप फाउण्डेशन नेपालले यही असार २२ गते ५ कि.मि. यात्रा दौड प्रतियोगिताकाे आयोजना गर्ने भएको छ । यस कार्यक्रमको मुख्य उद्देश्य लागु पदार्थ दुर्व्यसनी बारे जनचेतना जगाउने र स्वस्थ जीवनशैली प्रोत्साहन गर्ने रहेको होप फाउण्डेशनका अध्यक्ष राजिव थापाले एक पत्रकार सम्मेलनकाे आयाेजना गरी जानकारी दिएका छन् । उक्त कार्यक्रममा सहभागिता जनाउनेहरूले खुल्ला र विद्यार्थी वर्गमा निःशुल्क दर्ता गर्न सक्ने सम्मेलनमार्फत् जानकारी गराउँदै बिजेताहरूले नगद रु. ५० हजार बराबरको पुरस्कार पनि प्राप्त गर्ने छन् ।

आज बुधबार काठमाडाैंमा आयोजित सम्मेलनमा मिरा राईले युवाहरूलाई लागु पदार्थ दुर्व्यसनीबाट बचाउन जनचेतना फैलाउने उद्देश्यले गरिने यस्ता महत्वपूर्ण कार्यक्रमहरू देशैभरी गर्नुपर्नेमा जोडसमेत दिइएकाे छ ।

पत्रकार सम्मेलनमा उपस्थित अन्य वक्ताहरूले यस्ता महत्वपूर्ण कार्यक्रमहरू हरेक टोल समाजले आयोजना गर्नुपर्ने र सरकारले पनि यस्ता विकृतिहरूलाई निर्मूल पार्नको लागि राष्ट्रियस्तरको जनचेतनामुलक कार्यक्रमहरू गर्दै जानुपर्नेमा पनि जोड दिएका छन् ।