काठमाडाैं, असार ३१ ।
गायक रवि ओडले वैवाहिक बलात्कारको मुद्दा बाट सफाई पाएका छन् ।

‘नेपाल आइडल सिजन-२’का बिजेतासमेत रहेका गायक ओडलाई वैवाहिक बलात्कार र अप्राकृतिक मैथुनको आरोप लगाउँदै उनकी श्रीमतीले चैत्र २० गते प्रहरीमा उजुरी दिएकी थिइन् ।

ओड साँगीतिक कार्यक्रममा देश बाहिर हुँदा तत्काल पक्राउ नपरे पनि नेपाल आएलगत्तै उनी आफैँ ईलाका प्रहरी कार्यालयमा आत्मसमर्पण गर्न पुगेका थिए ।

कञ्चनपुरको कृष्णपुर नगरपालिका स्थायी घर भएका ओडले नेपाल आएर ईलाका प्रहरी कार्यालय झलारीमा आत्मसमर्पण गरेसँगै प्रहरीले नियन्त्रणमा लिएको थियो । यसरी प्रहरीले नियन्त्रणमा लिँदा उनी ५ लाख रुपैयाँ बुझाएर धरौटीमा रिहा भएका थिए । तर उनले रिहा भए पनि सफाई भने पाएका थिएनन् ।

करिब पाँच महिनापछि उनले सफाई पाएका छन् । कञ्चनपुर जिल्ला अदालतका न्यायाधीश चाणकमणि अर्यालको इजलासले अभियोग दाबी नपुग्ने फैसला गरेको हो ।

आइतबार न्यायाधीश अर्यालको मुद्दा फाँट २ मा उक्त मुद्दाबारे सुनुवाई भएको थियो । सुनुवाईपछि अदालतले अभियोग दाबी नपुग्ने फैसला गरेको कञ्चनपुर जिल्ला अदालतको वेबसाइटमा उल्लेख गरिएकाे छ ।