काठमाडाैं, श्रावण ११ ।
क्रिकेटर सन्दीप लामिछानेविरुद्ध बलात्कारको आरोपमा जाहेरी दिने गौशाला-२६ ले उच्च अदालतको फैसलाविरुद्ध पुनरावेदन नगरिदिन निवेदन दिएकी छन् ।

उनले केही दिनअघि उच्च सरकारी वकीलकाे कार्यालय पाटनमा निवेदन दिँदै उच्च अदालतको फैसलाविरुद्ध सर्वोच्च अदालतमा पुनरावेदन नगरिदिन आग्रह गरेको उच्च सरकारी वकील कार्यालय श्राेतले जानकारी दिएको छ ।

उनले आफूमाथि बलात्कारको घटना नै नभएको समेत निवेदनमा उल्लेख गरेकी छन् । आफूले संस्थाको दवाबमा सन्दीपविरुद्ध जाहेरी दिएको निवेदनमा उल्लेख गरिएकाे छ ।

‘गौशाला-२६ को निवेदन ३-४ दिन पहिले आएको छ । उनले आफूमाथि बलात्कार नभएको र संस्थाको दवाबमा परेर जाहेरी दिएको भन्नुभएको छ । उनले उच्च अदालतको फैसलाविरुद्ध सर्वोच्च अदालतमा पुनरावेदन नगरिदिन पनि अनुरोध गर्नुभएको छ’, उच्च सरकारी वकील कार्यालय श्राेतले भन्याे ।

उच्च अदालत पाटनका न्यायाधीशद्वय सुदर्शनदेव भट्ट र अञ्जु उप्रेती ढकालको इजलासले गत जेठ २ गते सन्दीपलाई निर्दोष ठहर गर्दै सफाइ दिने फैसला सुनाएको थियो ।

गत साता उक्त फैसलाको पूर्णपाठ सार्वजनिक भएको थियो । अदालतबाट पूर्णपाठ सार्वजनिक भएसँगै सर्वोच्चमा पुनरावेदनका लागि जाने बाटो खुलेको थियो ।

तर पीडित भनिएकी किशोरीले नै आफू पीडित नरहेको र पुनरावेदन नगरिदिन आग्रह गरेकी हुन् ।

काठमाडौं जिल्ला अदालतले गत पुस २५ गते गौशाला-२६ बालिग रहेको ठहर गर्दै सन्दीपलाई बलात्कारको मुद्दामा ८ वर्ष कैदको फैसला गरेको थियो ।

त्यसविरुद्ध सन्दीप लामिछाने उच्च अदालत पाटन गएका थिए । किशोरीको तर्फबाट पनि उनी नाबालिग नै रहेको दाबी गर्दै उच्च अदालतमा निवेदन दिएका थिए ।

उच्च अदालतले जिल्ला अदालतको फैसला बदर गर्दै सन्दीपलाई सफाइ दिएको थियो ।

गौशाला-२६ ले सन्दीपविरुद्ध २०७९ भाद्र २१ गते प्रहरी वृत्त गौशालामा बलात्कारको आरोपमा जाहेरी दिएकी थिइन् ।

२०७९ असोज २० गते काठमाडौं फर्किएका सन्दीपलाई त्रिभुवन अन्तर्राष्ट्रिय विमानस्थलबाट पक्राउ गरेर अनुसन्धान सुरु गरिएको थियो ।

काठमाडौं जिल्ला अदालतले कार्तिक १८ गते सन्दीपलाई पुर्पक्षका लागि थुनामा पठाउने आदेश दिएको थियो ।

उक्त आदेशविरुद्ध सन्दीपले उच्च अदालतमा निवेदन दिएका थिए । उच्च अदालतले विदेश जान नपाउने शर्तसहित पुस १८ गते २० लाख रुपैयाँ धरौटीमा रिहा गर्न आदेश दिएको थियो ।

त्यसविरुद्ध पनि सर्वोच्च पुगेका सन्दीपलाई सर्वोच्च अदालतले फागुन १५ गते विदेश जान पनि बाटो खोलिदिएको थियो ।