काठमाडाैं, श्रावण १२ ।
बनेपाको शीर मेमोरियल अस्पतालको आईसीयूमा उपचार गराइरहेकी एक सुत्करीको मृत्यु भएपछि पीडितका आफन्तले तोडफोड गरेका छन् ।

श्रावण ९ गतेदेखि बनेपा नगरपालिका-३ नालाकी ३२ वर्षीया ईश्वरी सुन्दाश सुत्केरी गराउन अस्पतालमा भर्ना भएकी थिइन् । हिजो दिउँसो उनले नर्मल डेलिभरीमार्फत् छोरा पाएकी थिइन् । तर, सुत्केरी भएपछि उनको अवस्था गम्भीर बनेको थियो । रक्तश्राव धेरै भएसँगै उनको पाठेघरको शल्यक्रियासमेत गरिएको थियो ।

शल्यक्रियापछि आईसीयूमा राखेर उपचार भइरहेकोमा गएराति उनको मृत्यु भएपछि आफन्तहरूले आईसीयूमा तोडफोड गरेका थिए ।

सुन्दाशको मृत्यु भएपछि पीडित पक्ष र अस्पतालबीच राति नै वार्ता भएको थियो । उक्त वार्तामा सहमति जुट्न नसकेपछि आज शनिबार पुनः वार्ता हुने बताइएको छ ।