काठमाडौं, साउन १६ ।
रोटरी क्लब अफ हिमालयन गल्फरले आफ्नो म्यागजिनको विशेषांक ‘द हिमालयन स्विङ’ सार्वजनिक गरेको छ । क्लबको तेश्रो पदस्थापना समारोहमा गत आइतबार उक्त विशेषांक सार्वजनिक गरिएको हो ।

विशेषांकमा रोटरी इन्टरनेशनलका प्रेसिडेन्ट स्टेफानी ए. उर्चिक ९क्तभउजबलष्भ ब्। ग्चअजष्अप०, डिस्ट्रिक्ट गभर्नर राजेन्द्रमान शेरचन र निवर्तमान प्रेसिडेन्ट प्यारजङ्ग थापाका साथै रोटरी वर्ष २०२२–०२३ का चार्टर प्रेसिडेन्ट भाईराजा पाण्डेको सन्देश समावेश गरिएको छ । विशेषांकमा रोटरी वर्ष २०२४–०२५ का प्रेसिडेन्ट विजयबहादुर श्रेष्ठको सन्देश पनि समावेश गरिएको छ ।

अंग्रेजी भाषामा प्रकाशित विशेषांकमा चार्टर प्रेसिडेन्ट पाण्डेले ‘फ्रम फेयरवेज टु फेलोसिप’ शीर्षकमा रोटरी क्लब अफ हिमालयन गल्फर स्थापनाको रोचक कथा प्रस्तुत गरेका छन् । त्यसैगरी डा. रिता थापाले ‘अ लाइफटाइम अन द ग्रिन’ शीर्षकमा आफ्नो समर्पण र लचिलोपनको यात्राबारे लेखेकी छन् । यसले नेपालको महिला गल्फमा डा. थापाको योगदानमाथि प्रकाश पारेको छ । उनको गल्फ यात्रालाई लचिलोपन, जोश र कहिल्यै हार नमान्ने महिलाको प्रतिबिम्ब मानिन्छ ।

वरिष्ठ मुटु रोग विशेषज्ञ डा. भगवान कोइरालाले आफूले गल्फ रोज्नुको कारणका साथै बाल स्वास्थ्यमा थप लगानीको आवश्यकताबारे लेखेका छन् ।

आरती राज्यलक्ष्मी राणाको प्रमुख सम्पादकत्वमा प्रज्ञा कुलुङ र सह्रिष्णुता शर्माको सम्पादकीय टीमले तयार गरेको विशेषांकमा उक्त क्लबले सञ्चालन गरेको धुँवारहित चुलो परियोजनाबारे पूर्णमान शाक्यले लेखेका छन् भने नेपाली सेनाका पूर्वसेनापति समेत रहेका रोटरी क्लब अफ हिमालयन गोल्फरका निवर्तमान प्रेसिडेन्ट प्यारजङ्ग थापाले नेपाली सेनामा महिला सशक्तिकरणबारे लेखेका छन् ।

क्लबका मेन्टर दिपक राजभण्डारीले रोटरीसम्बन्धी जानकारीमूलक सामग्री प्रस्तुत गरेका छन् । विशेषांकमा व्यवस्थापनको दर्शन शास्त्रसम्बन्धी जानकारीमूलक लेख पनि समावेश गरिएकाे छ । उक्त लेख क्लब सेक्रेटरी दमनबहादुर घलेले लेखेका हुन् । डा. विष्णुदेव पन्तले ‘अ ब्रिफ नोट अन मेम्बरसिप रिफ्लेक्सन’ शीर्षकमा नेपालमा रोटरी क्लबको आगमन र सदस्यता विस्तारबारे लेखेका छन् । विजयबहादुर श्रेष्ठले कागेश्वरी मनोहरास्थित श्री चौलानारायण स्कूलमा शिक्षा र सरसफाइको स्तरवृद्धिमा क्लबबाट सञ्चालित परियोजनाको योगदानबारे लेखेका छन् ।

क्लबको सफलताको कथा पनि विशेषांकमा समेटिएको छ । यसमा सुमेद भट्टराईको योगदान रहेको छ । क्लबबाट सञ्चालित परियोजना र कार्यक्रमको विवरण पनि विशेषांकमा छ । क्लबको २०२४/२५ का सर्भिस प्रोजेक्ट सभापति प्रवेश फुँयालले आफ्ना योजनाहरूबारे उल्लेख गरेका छन् ।

उक्त क्लबले रोटरी वर्ष २०२४/२५ का लागि रोटरियन विजयबहादुर श्रेष्ठलाई अध्यक्ष चयन गरेको छ । गत आइतबार सम्पन्न क्लबको तेश्राे पदस्थापना समारोहमा रोटरी क्लब ३२९२ नेपाल, भुटानका गर्भनर राजेन्द्रमान शेरचनले प्रेसिडेन्ट श्रेष्ठलाई रोटरी पिन प्रदान गरेका थिए ।

पदस्थापना समारोहलाई सम्बोधन गर्ने क्रममा शेरचनले रोटरी इन्टरनेशनलको म्याजिक रोटरी थिमका साथ सन् २०२४/२५ लाई भाइब्रेन्ट रोटरी वर्षको रूपमा अघि बढाउन चाहेको बताए ।

रोटरीको अन्तर्राष्ट्रिय अभ्यासलाई आत्मसात गर्दै शिक्षा, स्वास्थ्य, चेतनामूलक कार्यक्रमसँगै समुदायमा देखापरेको समस्या र चुनौतीलाई सामूहिक रूपमा चिर्न आफू सफल रहने विश्वास शेरचनले व्यक्त गरे ।

रोटरी वर्ष २०२४/२५ का लागि १० सदस्यीय क्लब सञ्चालन समिति गठन भएको छ । नयाँ सञ्चालन समितिमा प्रेसिडेन्ट इलेक्टमा दमनबहादुर घले, कोषाध्यक्षमा सुमेद भट्टराई, क्लब सचिवमा आरती राज्यलक्ष्मी राणा, प्रोजेक्ट चेयरमा प्रवेश फुँयाल, टीआरअफ चेयरमा सेस्टन गुरम्यान श्रेष्ठ, मेम्बरशीप चेयरमा विष्णुदेव पन्त, पब्लिक रिलेसन चियेरमा फिन्ट्सो ओङ्दी लामा, सरजेन्ट एट आर्मस आत्माराम सिम्खडा रहेका छन् ।

क्लबको निवर्तमान अध्यक्षमा प्यारजङ्ग थापा र मेम्बर मेन्टरमा दिपक भण्डारी छन् । क्लबले आगामी वर्षको लागि बजेटसँगै आफ्ना कार्यक्रमहरूलाई जनमानसमा लैजाने अध्यक्ष श्रेष्ठले बताए । उनले क्लबलाई मजबुत बनाउने अठोटसमेत व्यक्त गरे । सन् २०२४/२५ मा क्लब सदस्य संख्या ४० पुर्‍याउने उद्देश्य रहेको बताइएको छ ।