काठमाडाैं, श्रावण १८ ।
राष्ट्रिय परीक्षा बोर्डको सर्भरमा समस्या देखिएको छ । आज शुक्रबार कक्षा १२ को परीक्षा नतिजा सार्वजनिक भएसँगै बोर्डको वेबसाइट चल्न सकेको छैन ।

उक्त समस्याले परीक्षार्थी र अभिभावकहरूले हैरानी खेपिरहेका छन् । परीक्षा बोर्डका अध्यक्ष डा. महाश्रम शर्माकाअनुसार परीक्षामा ५२ दशमलव ९१ प्रतिशत उत्तीर्ण भएका छन् ।

गत बैशाख १४ गतेबाट सञ्चालित कक्षा १२ को परीक्षामा ४ लाख ९१ हजार ६१ जना विद्यार्थी सहभागी थिए । १२२ जनाको परीक्षा रद्द भएको छ भने १२ हजार ६७२ विद्यार्थी सबै परीक्षामा अनुपस्थित छन् ।

विद्यार्थीहरूले अहिले प्रकाशित भएको नतिजा आईभीआर, एसएमएस र यूएसएसडी तथा वेबसाइटमार्फत् प्राप्त गर्न सक्ने छन् । परीक्षार्थीहरूले नेपाल टेलिकमको ल्याण्डलाइन फोन, मोबाइलबाट १६०१ डायल गरी प्राप्त निर्देशानुसार नतिजा थाहा पाउन सक्ने छन् ।