काभा वुमन्सकाे महिला भलिबलमा भारतविरुद्ध नेपालकाे ऐतिहासिक जित

प्रकाशित मिति: १९ श्रावण २०८१, शनिबार १९:३५


काठमाडाैं, श्रावण १९ ।
काभा वुमन्स नेशनल लिग महिला भलिबलमा नेपालले भारतलाई पराजित गरेको छ । काठमाडाैंकाे त्रिपुरेश्वरस्थित दशरथ रंगशालाको भलिबल कभर्ड हलमा भएकाे खेलमा नेपालले भारतलाई ३-२ ले हराएको हो ।

नेपाली भलिबल इतिहासमा नेपालले पहिलो पटक भारतलाई हराएको हो । पाँचौँ तथा अन्तिम सेट १५-१३ ले आफ्नो पक्षमा पार्दै नेपालले ऐतिहासिक जित दर्ता गरेकाे हो ।

भारतसँगको खेलमा नेपालले पहिलो सेटमा १२-६ को अग्रता लिँदै शानदार सुरुवात गरे पनि भारतले पुनरागमन गर्दै ११-१३ गर्दै अग्रता अंक २ मा घटाएपछि नेपालले पहिलो टाइम आउट लिएको थियो । नेपालले अग्रतालाई निरन्तरता दिँदै २२-१८ मा पुर्‍याएपछि पहिलो सेटमा जित पक्का जस्तै बनेको थियो । नेपालले पहिलो सेट २५-१८ ले सहजै जितेको थियो ।

दोश्राे सेटमा सुरुवातमा नेपाल ६-६ को अवस्थामा थियो । तर त्यसपछि भारतले निरन्तर अंक बटुल्दै १५-१२ को सहज जित हात पार्‍यो । खेलाडी परिवर्तनमा गल्ती गरेपछि नेपालले रातो कार्ड पाउँदा भारतले अन्तिम अंक नखेली पाएको थियो ।

तेश्राे सेटमा नेपालले १६-९ को अग्रता लिँदै सहज जितको आधार तयार पारेको थियो । तेश्राे सेटमा २५-१७ को जित हात पार्दै ऐतिहासिक जित निकाल्नबाट एक सेट जित टाढा थियो । चौथो सेटमा भारत सुरुवातमा ८-३ ले अघि थियो । भारत निरन्तर चौथो सेटमा अघि थियो । भारत मध्य समयमा १५-१० ले अघि थियो ।

नेपालले १५-१७ बनाउँदै खेलमा फर्किने सम्भावना देखाएको थियो । निकै प्रतिस्पर्धात्मक खेलमा दुई अंकले पछि परेको अवस्थाबाट लगातार पाँच अंक गुमाउँदा भारतले चौथो सेट २५-१८ ले जितेको थियो । निर्णायक पाँचौँ सेटको सुरुवात प्रतिस्पर्धात्मक बनेको थियो । उषा भण्डारी र सरस्वती चौधरीको स्पाइकमा अंक जोड्दै नेपाल ५-२ को अग्रता लिँदै ऐतिहासिक जितको संकेत दिएको थियो । नेपालले ८-५ मा पाँचौँ सेटको कोर्ट परिवर्तन गरेको थियो ।

नेपाल १२-१० को अवस्थामा रहँदा भारतले टाइम आउट लिएको थियो । टाइम आउटलगत्तै अंक जोडेको थियो । १२-१३ को अवस्थामा सरस्वतीले लेफ्ट साइडबाट अंक जोडेपछि नेपाल जितभन्दा एक अंक टाढा थियो । तर भारतले पुन अंक जोड्दा खेल १३-१४ को अवस्थामा पुगेको थियो । नेपालले भारतको मोमेन्ट्स ब्रेक गर्न टाइम आउट लियो ।

यसअघि नेपाल र भारतबीचको महिला भलिबलमा सबैभन्दा उत्कृष्ट प्रदर्शन २०१९ को दक्षिण एशियाली खेलकुद (साग)को फाइनल दशरथ रंगशालामा थियो । उक्त खेलमा नेपाल ३-२ सेटले हार्दै स्वर्ण जित्नबाट चुकेको थियो ।


प्रतिक्रिया

ताजा खबर

More

सुनचाँदी काराेबारकाे अन्तिम दिन सुन र चाँदीकाे मूल्य घट्याे

काठमाडाैं, चैत २२ । सुनचाँदी काराेबारकाे अन्तिम दिन आज शुक्रबार नेपाली बजारमा सुन र चाँदीको.....