काठमाडाैं, श्रावण ३० ।
दाङमा लाठी प्रहार गरी श्रीमानले श्रीमतीको हत्या गरेका छन् ।

लमही नगरपालिका-९ स्यालेका ४४ वर्षीय चक्रबहादुर भनिने श्यामकुमार कुमालले लाठी प्रहार गरी ४२ वर्षीया श्रीमती इश्वरी कुमालको हत्या गरेका हुन् ।

मंगलबार बेलुका ८ बजेतिर हात्तीखालस्थित पसलबाट फर्किने क्रममा घरनजिकै बाटोमा मदिराले मातेका श्रीमानले सामान्य विवादकै क्रममा श्रीमतीमाथि लाठी प्रहार गर्दा घटनास्थलमै उनको मृत्यु भएको एक जना प्रहरी अधिकारीले बताए ।

ती प्रहरी अधिकारीकाअनुसार श्रीमती पसलमा चामल किन्न भनेर गएकी थिइन् ।

उनलाई लिन भनेर श्रीमान पनि पसलमा गएका थिए । श्रीमान-श्रीमती दुबैले सोही पसलमा मदिरा सेवन गरेका थिए । मदिरा सेवनपछि मातेकी श्रीमती घरमा जान नमानेपछि श्रीमानले घर तर्फ लगेको स्थानीयले बताएका छन् ।

बाटोमा उनीहरू बीचमा सोही कुरामा विवाद हुँदा श्रीमानले श्रीमतीको टाउको लगायत विभिन्न भागमा लाठी प्रहार गरेपछि उनको घटनास्थलमै मृत्यु भएको एक प्रहरी अधिकारीले बताए ।

श्रीमतीको हत्या गरी फरार भएका कुमाललाई जलकुन्डीका स्थानीयले नियन्त्रणमा लिएर प्रहरीलाई बुझाएका थिए । हत्या आरोपी कुमाल वडा प्रहरी कार्यालय लमहीको प्रहरी हिरासतमा राखिएका छन् ।

दाङका प्रहरी प्रवक्ता डीएसपी रामप्रसाद तिमल्सिनाले घटनाबारे थप अनुसन्धान गरी आज बुधबार बेलुका आरोपितलाई सार्वजनिक गरिने बताए ।

हत्या गरिएकी इश्वरीको शवलाई पोष्टमार्टमका लागि लमही अस्पतालमा लगिएको छ । उनीहरूका तीन छोरी र एक छोरा रहेको स्थानीयले जानकारी दिएका छन् ।