काठमाडाैं, श्रावण ३० ।
भारतीय अभिनेत्री सपना चौधरीविरुद्ध पक्राउ पूर्जी जारी गरिएकाे छ ।

मंगलबार दिल्लीको तीस हजारी अदालतले ठगी मुद्दामा सपनाको अनुपस्थितिका कारण वारेन्ट जारी गरिएको हो ।

सपनाविरुद्ध दिल्लीको आर्थिक अपराध शाखाले आरोप-पत्र दायर गरेको छ । यो घटना सन् २०२१ को हो जब पवन चावला नामका व्यक्तिले सपनाविरुद्ध उजुरी दिएका थिए ।

रिपोर्टअनुसार, चौधरी उपस्थित नभएको भन्दै मुख्य न्यायिक मजिस्ट्रेट (सीजेएम) रश्मी गुप्ताले सपना चौधरीविरुद्ध गैर जमानती वारेन्ट जारी गरेकी हुन् ।

उजुरीकर्ता पवन चावलाले सपनालाई कामका लागि पैसा दिएको बताएका छन् । तर, सपना र उनको परिवारका सदस्यहरूले त्यो पैसाको दुरूपयोग गरे । उनीविरुद्ध मे २८, २०२४ मा ठगीको मुद्दा दर्ता भएको थियो ।