काठमाडौं, माघ २२ ।
नेपाल टेलिकमले प्रिपेड मोबाइल प्रयोगकर्ताहरूलाई पनि आजबाट फोर–जी सेवा उपलब्ध गर्ने भएको छ ।

टेलिकमको १३ औँ वार्षिकोत्सवको अवसरमा राजधानी र पोखराका प्रिपेड सिम प्रयोगकर्ताहरूलाई पनि फोर–जी सेवा उपलब्ध गराउन लागिएको हो । फोर–जीका लागि काठमाडौंमा तीन सय आठ वटा बिटिएस टावरलाई स्तरोन्नति गरिएको टेलिकमका प्रवक्ता प्रतिभा वैद्यले जानकारी दिएकी छन् ।

यसैगरी, पोखरामा ७९ वटा टावरको स्तरोन्नति गरिएको छ । करिब ३९ करोड रुपैयाँ खर्च गरेर फोर–जी सेवा सुरु गरेको टेलिकमले जनाएको छ । गत पुस १७ गतेदेखि काठमाडौं र पोखराका पोष्टपेड ग्राहकलाई टेलिकमले फोर–जी सेवा दिइरहेको छ ।