काठमाडाैं, भाद्र २२ ।
यस वर्षको इन्द्रजात्रा अर्थात येँयाःको क्वःहनेयाः कुमारी यात्राका लागि आवश्यक पर्ने इन्द्रध्वजा फहराउने लिङ्गो भक्तपुरबाट काठमाडौं पुर्‍याइएको छ ।

भक्तपुरको सूर्यविनायक नगरपालिका-१० स्थित चित्तपोलको सामुदायिक वनबाट नेपाल पञ्चाङ्ग निर्णायक समितिको शुभ साइतमा भक्तपुरको जङ्गलमा काटेर ल्याइएको यःसिँ अर्थात लिङ्गो गएराति काठमाडौं पुर्‍याइएको केन्द्रीय मानन्धर सङ्घका सदस्य एवं प्रचार संयोजक केके मानन्धरले जानकारी दिएका छन् ।

यहीँ भाद्र ३० गते आइतबार बिहान ८ः२६ बजे इन्द्रध्वजोत्थान अर्थात इन्द्रध्वजासहितको लिङ्गो उठाउन गत बिहीबार बिहान १० बजेर ४७ मिनेटको साइतमा बसन्तपुरबाट भक्तपुर प्रस्थान गरेकोे केन्द्रीय मानन्धर सङ्घको टोलीले सोही दिन बेलुकी ७ बजे भक्तपुरको चित्तपोलमा पुगेर हनुमानढोका दरबारबाट आएको ब्राह्मणद्वारा पूजा विधि सम्पन्न गरी राति ८ः२७ बजेको साइतमा यःसिँको लागि रानी सल्लाको रुख काटिएको थियो ।

शुभ साइतमा पूजा गरेर छाडेको बोकाले जुन रुखमा छुन्छ त्यही रुखलाई काट्ने प्रचलन रहेकाे छ । रुख काट्नुअघि नेपाली सेनाको श्री शार्दूल जङ्ग गुल्मका गुल्मपतिको नेतृत्वमा चित्तपोल पुगेको गुरुजुको पल्टनले सलामी अर्पण गरेको थियो ।

नेपाल पञ्चाङ्ग निर्णायक विकास समितिले संस्कृति, पर्यटन तथा नागरिक उड्डयान मन्त्रालय तथा त्रिपुरेश्वरस्थित गुठी संस्थानलाई इन्द्रजात्रासम्बन्धी विभिन्न साँस्कृतिक गतिविधिको शुभ साइत उल्लेख गरी पठाइएको पत्रबमोजिम सङ्घले इन्द्रध्वज (यःसिँ)का लागि रानीसल्लाको रुख काटिएको मानन्धरले बताए ।

रुख काटिएसँगै पाँच जना गुरुजुको पल्टनले एकैपटक बन्दुक पड्काएर हर्ष बढाईं दिएको थियो । भक्तपुरमा यःसिँ लिन जानेदेखि काठमाडौंसम्म पुर्‍याएर ठड्याउने र ढाल्नेसम्मको काममा हनुमानढोका दरबारस्थित श्री शार्दूल जङ्ग गुल्म (नेपाली सेनाको गुरुजुको पल्टन)ले सहकार्य गर्दै आएको छ ।

वर्षा र सहकालका देवता इन्द्रको पूजा आराधना गरी परम्परागत शैलीमा मनाइने इन्द्रजात्राको लिङ्गो अर्थात यःसिँ भाद्र शुक्लपक्ष यँलाथ्वः द्वादशीको दिन इन्द्रध्वजोत्थान गरी सुरु हुने इन्द्रजात्रा चौथी अर्थात इन्द्रध्वज आठ दिनसम्म मनाउने गरिन्छ ।

यस अवधिमा विभिन्न नाच, कुमारी, भैरव, गणेशको रथ यात्रा पनि हुनेछ ।