काठमाडाैं, कार्तिक १ ।
चर्चित पप ब्याण्ड ‘वन डाइरेक्शन’ का पूर्वसदस्य गायक लियाम पेनेको ३१ वर्षको उमेरमा निधन भएको छ ।

मिडिया रिपोर्टकाअनुसार अर्जेन्टिनाको ब्यूनस आयर्सको एक होटलको तेश्राे तल्लाबाट खसेर लियाम पेनेको मृत्यु भएको हो ।

पालेर्मोको कोस्टारिका स्ट्रिटमा रहेको होटलमा यो दुर्घटना भएको जनाइएको छ । उनको निधनको खबरले सिङ्गो संगीत क्षेत्र शोकमा डुबेको छ ।

यसै महिनामा उनले अर्जेन्टिनामा भएको एक कन्सर्टमा आफ्नो प्रस्तुति दिएका थिए ।

सन् २०१० मा यूकेको रियालिटी शो ‘द एक्स फ्याक्टर’ मा सहभागी भएपछि पेनेसहित जयान मालिक, ह्यारी स्टाइल, लौइस टमलिनसन र नियाल होरानले ‘वन डाइरेक्शन’ नामक पप ब्याण्ड बनाएका थिए । यो ब्याण्ड २०१६ मा निष्क्रिय भएको थियो ।

यस ब्याण्डले पाँच एल्बम निकालेको थियो । उनीहरूको २०१३ मा आएको तेश्राे एल्बम मिडनाइट मेमोरिज २०१३ को विश्वभरमा धेरै बिक्री भएको एल्बम बनेको थियो ।