काठमाडाैं, कार्तिक ५ ।
रेखा पौडेल र प्रिति राईको ह्याट्रिकमा नेपालले वुमन्स साफ च्याम्पियनशीप-२०२४ अन्तर्गत आज सोमबार माल्दिभ्सलाई ११ विरुद्ध शून्य गाेलले पराजित गरेको छ । यो जितसँगै नेपाल समूह ‘बी’ को शीर्ष स्थानमा प्रवेश गरेकाे छ ।

नेपालको दुई खेलबाट चार अंक भएको छ भने भुटानको पनि दुई खेलबाट चारै अंक रहेको छ । नेपाल गोल अन्तरको आधारमा समूहको पहिलो रहेको हो । श्रीलंका तीन अंकसहित तेश्राे स्थानमा रहेकाे छ भने यता माल्दिभ्स भने शून्य अंकमा छ ।

यससँगै प्रतियोगितामा माल्दिभ्सको चुनौती समाप्त भएको छ । अब नेपालले लिग चरणको आफ्नो अन्तिम खेलमा श्रीलंकासँग प्रतिस्पर्धा गर्ने भएकाे छ । भुटान भने माल्दिभ्ससँग भिड्ने छ ।

काठमाडाैंकाे त्रिपुरेश्वरस्थित दशरथ रङ्गशालामा भएको खेलमा रेखाले पाँच गोल गरिन् । उनले ३२, ४२, ४८, ६३ र ७७ औँ मिनेटमा गोल गरेकी थिइन् । यस्तै, प्रिति राईले भने ६, ६५ र ८७ औँ मिनेटमा सम्भव भएको थियो । अन्य तीन गोल भने सबिता रानामगर, अनिता केसी र अमिशा कार्कीको नाममा रह्यो ।

सबिताले २९, अनिताले ६८ र अमिशाले ८८ औँ मिनेटमा गोल गरेकी थिइन् । यसै खेलबाट नेपालका लागि सजनी थोकरले डेब्यु गरेकी छन् । यही प्रतियोगिताका लागि फ्रान्सबाट आइतबार बिहान नेपाल आइपुगेकी सावित्रा भण्डारीलाई भने मैदानमा उत्रिनु परेन ।