काठमाडाैं, मंसिर १ ।
आगामी मंसिर १६ गते कीर्तिपुरको मेयरका लागि हुने उपनिर्वाचनमा नेपाली कांग्रेसले कृष्णमान डंगोललाई उम्मेदवार बनाउने भएको छ ।

आज शनिबार बसेको नेपाली कांग्रेसको वागमती प्रदेश समितिको बैठकले उनलाई उम्मेदवार बनाउने निर्णय गरेको हो । पालिकाबाट १४ जनाको नाम जिल्ला हुँदै प्रदेशमा पुगेको थियो ।

प्रदेश समितिले डंगोललाई नै उम्मेदवार बनाउने निर्णय लिएकाे छ । उनी नेपाली कांग्रेस कीर्तिपुर नगर समिति सभापतिसमेत हुन् ।

वि. सं. २०७९ को चुनावमा नेपाली कांग्रेसका राजकुमार नकर्मी ९०४३ मत ल्याएर विजयी भएका थिए । उनको निधन भएपछि त्यहाँ उपचुनाव हुन लागेको हो ।

दोश्राे एमालेका केशरत्न बज्राचार्यले ५५०७ मत पाएका थिए भने माओवादीका शिवशरण महर्जनले ४०९० मत ल्याएका थिए ।

कांग्रेसले मेयर र उपमेयर मात्रै होइन, १० मध्ये ९ वटा वडाध्यक्ष पनि जितेको थियो । अघिल्लो पटक जितेकाले यसपटक पनि आफूहरूले नै जित्ने कांग्रेसको दाबी रहेकाे छ ।