काठमाडाैं, मंसिर २ ।
सहकारी ठगी प्रकरणमा राष्ट्रिय स्वतन्त्र पार्टीका सभापति एवं पूर्वगृहमन्त्रीसमेत रहेका रवि लामिछानेविरुद्ध काठमाडौंमा पनि पक्राउ पुर्जी जारी भएको छ ।

रविसँगै नेपाल प्रहरीका पूर्वडीआईजी छविलाल जोशीविरुद्ध पनि पक्राउ पुर्जी जारी भएको हो ।

काठमाडाैंकाे कालिमाटीस्थित स्वर्णलक्ष्मी सहकारी ठगी प्रकरणमा काठमाडौं जिल्ला अदालतले आज आइतबार उनीहरूविरुद्ध पक्राउ पुर्जी जारीका लागि अनुमति दिएको हो ।

यसअघि, यो सहकारी ठगी प्रकरणमा २४ जनाविरुद्ध पक्राउ पुर्जीसमेत जारी भएको थियो । यो सहकारीका अध्यक्ष गितेन्द्रबाबु (जीबी) राई हुन् ।

यो सहकारी ठगी प्रकरणमा ६ सय ४५ जना बचतकर्ताहरूले प्रहरीमा जाहेरी दिएका थिए । स्वर्णलक्ष्मीबाट १ अर्ब ११ करोड रुपैयाँ अपचलन भएको प्रहरीको प्रारम्भिक अनुमान रहेकाे छ ।