काठमाडाैं, मंसिर ३ ।
झाक्री प्रकाश भुजेल र ब्रम्हखेलमा उनले चलाएको ल्याण्ड क्रुजर जीपको ठक्करबाट मृत्यु भएका दम्पतीको परिवारबीच सहमति भएको छ ।

कार्तिक २८ गते काठमाडौंको शंखरापुर नगरपालिका-९ स्थित ब्रम्हखेलमा झाक्रीले चलाएको जीपले ठक्कर दिँदा कागेश्वरी मनोहरा-२ घर भएका नारायण नगरकोटी र उनकी पत्नी सानुमायाको मृत्यु भएको थियो । मृतक परिवार र भुजेल पक्षको बीचमा सहमति भएको जिल्ला प्रहरी परिसर काठमाडौंका एसपी नवराज अधिकारीले जानकारी दिए । उनले भने, ‘अस्पतालबाट शव लगेर दाहसंस्कार गर्न दुबै पक्षबीच सहमत भएका छन्, आर्थिक विषयमा हामीलाई जानकारी भएन ।’

दुर्घटनापछि झाक्रीलाई प्रहरीले पक्राउ गरेर अनुसन्धान गरिरहेको छ । उनलाई जिल्ला प्रहरी परिसर काठमाडौंको हिरासतमा राखिएको छ ।

झाक्रीले चलाएको बा. १९ च २६९५ नम्बरको गाडीले नारायण नगरकोटीको दम्पती सवार वागमती प्रदेश-०२-०१८ प ६८७५ नम्बरको मोटरसाइकललाई ठक्कर दिएको थियो ।

नगरकोटी दम्पतीको उपचारको क्रममा ग्राण्डी अस्पतालमा मृत्यु भएको हो । नगरकोटीका दुई जना बच्चा छन् । घटनाबारे प्रहरी वृत्त बौद्धले अनुसन्धान गरिरहेको छ ।